Naimaldit ti dua a kaso ti panagdukot kadagiti lider-masa iti Southern Tagalog iti napalabas a dua a lawas. Malaksid ditoy, adda met dagiti panaglabsing iti karbengan-tao dagiti soldado ken pulis idiay Isabela, Quezon ken Metro Manila.

Idiay Batangas, dinukot dagiti pwersa ti estado ni Pauline Joy Banjawan, organisador ti Kadamay-Southern Tagalog nga agkamkampanya para iti Bayan Muna, idi Abril 26. Dua nga aldaw kalpasan ti panagpukaw, natunton isuna iti istasyon ti pulis iti Santo Tomas, Batangas.

Naamuan a dinukot isuna ti 59th IB, naipasidong iti maysa nga aldaw a tortyur sakbay nga inpan da kadagiti pulis. Napilaan ni Banjawan ti kaso nga illegal possession of firearms and explosives.

Idiay Rizal, pinidot ken inbalud dagiti soldado ti 80th IB ti mannalon a ni Jonathan del Castello idi rabii ti Abril 27 idiay Tanay. Segun iti biktima, naipasidong isuna iti interogasyon ken binutbuteng a patayen isuna dagiti soldado. Inakusaran da a ti awit na a taraon idi kinemmeg da isuna ket ibalon na iti New People’s Army (NPA). Pinalubosan laeng isuna ti 80th IB idi parbangon ti Abril 28.

Istraping. Idiay Isabela, pinaputukan dagiti elemento ti 502nd IBde ti lima a nailyan a minorya nga Ifugao bayat nga agkalkalap da idi Abril 21 iti Sityo Sapiot, Barangay Tappa, San Mariano. Tallo kadagiti sibilyan ti dagus a natalged a nakaawid bayat a dua ti saan a dagus a natunton. Nagpalto-paltog met ti 86th IB iti Barangay Dicamay Dos, Jones idi Abril 20.

Militarisasyon. Idiay Quezon, saan a bumaba iti 2,000 a soldado ti 2nd ID ti naibuyat para iti focused military operation (FMO) iti uppat a barangay ti Lopez manipud idi Abril 21. Agsusumbangir a tsekpoynt ti intakder dagiti militar ken pulis a nangtantan iti pagbiagan, panagtalon ken nawaya a panaggaraw dagiti residente. Dawdawatan da ti sedula ti amin a dumalan iti tsekpoynt.

Panaglipit. Naharang iti eropuerto ken naparitan a sumrek iti Pilipinas idi Abril 26 ni Gordon Mutch, Amerikano a myembro ti Baltimore Committee for Human Rights in Philippines (BaltCHRP). Immay ditoy Pilipinas ni Mutch tapno agpaliiw iti eleksyon 2025 ken makita ti kasasaad dagiti Pilipino iti sidong ti rehimen Marcos. Inbalud isuna ti Philippine Bureau of Immigration iti uppat nga oras, sakbay nga indeport da idiay US gapu iti “kontra-gubyerno nga aktibidad na.”