Awit dagiti bandera ti National Democratic Front (NDF) ken dagiti alyado nga organisasyon daytoy, nagiruswat ti rali nga apagdarikmat ti ginasut a kameng ti nadumaduma a rebolusyonaryo a grupo iti Divisoria idiay Manila idi Abril 29 tapno rambakan ti anibersaryo ti NDFP. Panawagan da: “Armado a rebolusyon ti pudno a solusyon!” Linagip ti NDFP ti maika-52 anibersaryo daytoy idi Abril 24.

Nagisab-it kadagiti istrimer ti Christians for National Liberation (CNL) ken Revolutionary Council of Trade Unions (RCTU) asideg iti Malacañang nga addaan panawagan ti panangiyabnte ti rebolusyon.

Segun ken Elias Dipasupil, kabuklan a kalihim ti NDFP, ti NDFP kas organisasyon ti nagkaykaysa a prente ket para iti rebolusyonaryo nga armado a dangadang. “Bayat a mabigbig ti nadumaduma a porma ti pannakidangadang, itantandudo ti NDFP ti armado a dangadang kas kangrunaan a porma tapno maduprak ti bulok a malakolonyal ken malapyudal a sistema bayat nga in-inot ken tuluy-tuloy a mabukbukel ti baro a sistema iti panangpadur-as kadagiti organo ti bileg iti pulitika iti kaaw-awayan.

Inallukoy na dagiti alyado nga organisasyon nga agpalawa ken agpapigsa. “Iti agdama a sangalubongan ken nailyan a krisis, kasapulan la unay dagiti organisasyon ti masa para iti pannakidangadang ti umili a Pilipino laban iti panangidadanes ken pananggundaway ken iti panangbukel ti kagimongan a rumbeng a para kadakuada, nga agserserbi iti interes da,” kuna na.

Nagipeksa met ti kablaaw ti nadumaduma nga organisasyon manipud iti tukad rehiyon agingga nailyan, ken dagiti partido iti ballasiw-taaw para iti anibersaryo ti NDF. Kabilang ditoy ti CPP, NPA, dagiti balangay ti NDF iti Southern Tagalog ken Ilocos, NDF-Palawan, NDF-International, Liga ng Agham para sa Bayan, Makabayang Kilusan ng Bagong Kababaihan, RCTU, Kabataang Makabayan ken KM-Southern Tagalog, Compatriots, CNL ken Pambansang Katipunan ng mga Magbubukid.

Ti NDF ket kinablaawan met ti Friends of the Filipino People in Struggles (FFPS) ken dagiti balangay ken organisasyon daytoy. Nagiyaramid ti FFPS kadagiti aktibidad ken panagtitipon iti nadumaduma a pagilyan idi Abril 26 kas panagrambak. Nagidanon met ti kablaaw ti International Bureau ti Communist Party of Turkey (TKP-ML) ken Cairde na Filipínigh Committee ti Anti-Imperialist Action Ireland.