Pinadayawan ti Communist Party of the Philippines ken New People’s Army (NPA) Negros Island (Apolinario Gatmaitan Command) ti pito a Nalabbaga a mannakigubat daytoy a napapatay iti “overkill” nga armado nga operasyon ti Armed Forces of the Philippines (AFP) idi Abril 27 ti agsapa idiay Barangay Tapi, Kabankalan City, Negros Occidental. Pimmusay ti Kabankalan 7 bayat nga umak-akem da ti nabalitokan a rebbengen ti agtultuloy a panangiyabante ti armado a dangadang, panagpalawa iti base a masa ken agraryo a rebolusyon iti isla.

Ti pito a namartir ket da Reniel Locsin Cellon (Ka Randy), Mary Jane Magquilat (Ka Shonie), Charity Amacan (Ka Mayang), Johnrey Mejares (Ka Jai), Glenda Tinio Mejares (Ka Glendyl), Ka Pitong ken Dee Supelanas (Ka Dahlia). Ni Supelanas ket dati a lider estudyante ti UP-Cebu. Tallo kadagiti martir ket senior citizen ken addaan kundisyon a medikal a makagapu ti kinarigat da nga agtignay.

Idi Abril 29, nagtitipon ken sangsangkamaysa a nagitugkel ti kandila dagiti kabataan a Cebuano iti University of the Philippines (UP)-Cebu tapno padayawan ni Supelanas. Sakbay a nagserbi isuna kas Nalabbaga a mannakigubat, ni Supelenas ket maysa nga aktibista ken lider-estudyante. Indauluan na dagiti kampanya para iti edukasyon, serbisyo iti gimong, demokratiko a karbengan ken panaglaban iti tiraniya ken pasismo.

Nagidanon ti pannakipagrikna ti Partido ken NPA-Negros Island kadagiti pamilya, gagayyem ken kakadwa ti Kabankalan 7. “Bayat nga agladladingit, aramaten yo daytoy a gundaway tapno ad-adda a tenneben ti rebolusyonaryo a pakinakem, kas pamuspusan ti pananggun-od ti hustisya kadagiti martir tayo,” segun ken Ka Marco Valbuena, upisyal iti impormasyon ti Partido.

Binabalaw met ni Valbuena ti panangtagibassit ti National Task Force-Elcac ken AFP iti lagip ni Supelanas. Ipinpinta dagiti pwersa ti estado nga isuna ket “biktima ti manipulasyon” ti Partido ken ti NPA, iti laksid ti kinapudno a rinibo a kabataan ti nakipaset ken makipaset pay iti rebolusyonaryo a tignay tapno baliwan ti bulok a kagimongan gapu iti panagayat da iti ina a pagilyan.

Kabayatan na, immawag ti imbestigasyon ti grupo iti karbengan-tao a Kapatid iti pammapatay iti Kabankalan 7. Idurduron da ti imbestigasyon gapu ta agdudua da nu “pudno ngata nga engkwentro a militar ti napasamak wenno naigagara a pammapatay.” Masmasdaaw ti grupo nga awan man laeng uray maysa ti nakalasat kadagiti pito a Nalabbaga a mannakigubat.

Kuna ti grupo, bin-ig a napigpigsa ken superyor ti bilang ken armas ti AFP laban kadagiti nakaistasyon a Nalabbaga a mannakigubat, ngem apay a saan da laengen nga inaresto koma isuda? “Apay a pulos nga awan kadakuada—wenno amin da koma—ti naaresto ken napilaan ti kaso? Tapno agbalin da a balud pulitikal imbes nga agnanayon a pinagulimek da dagitoy?” segun pay iti grupo.