Barikada ti umili nga Aeta iti Mt. Pinatubo. Nagitakder ti barikada idi Abril 18 ti komunidad ti Aeta iti Mt. Pinatubo ti Sityo Tarukgan, Barangay Santa Juliana, Capas, Tarlac tapno irupir ti karbengan da iti daga da. Manon a tawen a saan a baybayadan nga usto dagiti ahensya ti estado iti turismo dagiti katutubo ken saan met a tultulungan ti NCIP isuda. Saan a nainkalintegan nga inaresto dagiti pulis ti sumagmamano kadakuada ken pinilaan isuda ti kaso nga obstruction of public passage ken saan nga awtorisado a panagserrek iti protektado a lugar.

Panagsubli iti trabaho idiay Bataan. Naiduron dagiti mangmangged ti administrasyon ti FCF Manufacturing Corporation nga isubli iti trabaho dagiti inpasidong daytoy iti istatus a “forced leave” idi Abril 19. Immawag ti grupo iti kumpanya nga isardeng ti maaw-awagan a “work speeding” ken dadduma pay nga iskema ti panangiyimbak ti nalpas a produkto gapu ta daytoy ti mangidurduron iti patakaran a forced leave.

Parada iti baybay laban iti offshore wind farm iti Ilocos. Nagisayangkat ti parada dagiti mangngalap iti Pagudpud idiay Ilocos Norte idi Abril 20 tapno supyaten ti plano a panangitakder ti BuhaWind Offshore Windfarm iti baybay ti Pasuquin, Burgos, Bangui ken Pagudpud. Iti tallo a tawen a konstruksyon ti wind farm, maparitan a makapagkalap asideg ditoy dagiti mangngalap.

Tignay kontra Prime Water idiay Bulacan. Nagisayangkat ti noise barrage ti nadumaduma a grupo idi Abril 25 tapno kundenaren ti palpak a serbisyo a danum ti Prime Water iti San Jose Del Monte City idiay Bulacan. Manipud idi maitakder ti joint venture wenno panagsugpon ti Prime Water ken ti San Jose Del Monte Water District idi 2018, agsusumbangiren ti nagbalin a problema dagiti residente kas ti manmano ken nakapsut nga ayus ti narugit ken saan a mabalin nga inumen a danum, ken nakanginngina a babayadan iti serbisyo.