Tunggal adda ti Nalabbaga a mannakigubat ti New People’s Army nga agtaud iti sektor ti kabataan-estudyante a matmatay iti labanan (wenno ingagara a patayen) ti Armed Forces of the Philippines (AFP), awan sabali a sangkadagullit ti National Task Force (NTF)-Elcac nu saan a ti pagkasapulan a pawilan ti ideya ken kapanunotan ti kabataan kadagiti unibersidad. Ibagbaga da a wagas daytoy tapno lapdan ti pannakipaset dagiti kabataan iti armado a dangadang wenno aw-awagan daytoy a “radikalisasyon” wenno “terrorist grooming.”

Daytoy a taktika ti AFP ken NTF-Elcac ket nagtaud ken nakabalangkas iti doktrina a “countering violent extremism” (CVE wenno “panaglaban iti naranggas nga ekstremismo”) ti US. Maaw-awagan nga “ekstremismo” wenno dagiti “napeklan nga ideolohiya” ti anyaman nga ideya a maibilbilang a pangta iti agar-ari a sistema. Ti CVE ket pangkalkalub iti panangpawil iti amin a langa ti panagiyebkas ken panaglaban iti estado. Parparwaren daytoy a ti “ekstremismo” ti mangidurduron iti umili a lumaban kabilang ti lehitimo ken nainkalintegan a panagarmas ti umili laban iti reaksyunaryo nga agar-ari nga estado. Saan a simple nga ideya ken pammati ti mangibungbunga ditoy, kaniwas iti parparwaren ti CVE, nu di ket ti mismo a kongkreto a kundisyon ti panangidadanes, panaggundaway ken kinaranggas ti estado.

Ti doktrina ken programa a CVE

Ti CVE ket umuna a napasingkedan iti sidong ti administrasyon nga Obama ti US idi 2014. Inaramat da daytoy idi panawen ti kampanya a kontra-Muslim wenno panagipasaknap ti Islamophobia, ken kagiddan a pinuntirya dagiti progresibo nga aktibista a pangpulitika. Parparwaren ti doktrina a dagiti Muslim ken dagiti aktibista ket “naranggas iti kaunggan.”

Naaramat ti CVE para iti panangpulis ken panang-espiya kadagiti lider ti komunidad tapno i-profile wenno mangbukel ti ladawan dagiti indibidwal batay kadagiti tignay da nangruna iti usapin ti relihiyon, puli ken pulitika. Panggep daytoy a bantayan ti “radikalisasyon” dagiti indibidwal a makunkuna a tulbek tapno agtennag iti “terorismo.” Maaw-awagan met daytoy kas “soft counterterrorism.”

Uray awan pay ti inaramid ti maysa nga indibidwal, mabalinen a maawagan a “terorista” ti ugali ken taray ti panagpanunot na. Labsing daytoy kadagiti basaran a karbengan-tao kas ti karbengan iti pribasiya, panagiyebkas, panagtignay, panagorganisa ken dadduma pay. Agimulmula daytoy ti buteng ken agibungbunga ti “self surveillance” wenno “panagbantay iti bagbagi” tapno saan a mapagatapan, kasta met a mangperperdi kadagiti komunidad.

Panagdadael ti CVE iti Pilipinas

Idi 2019, binukel ken pinasingkedan ti gubyerno ti Pilipinas babaen ti Anti-Terrorism Council iti sidong ti Human Security Act ti maysa a National Action Plan on Preventing and Countering Violent Extremism (NAP P/CVE). Nakalanad kas panggep daytoy ti panangimaton kadagiti programa a mangsungsungbat iti pangpulitika, pang-ekonomya, pangkultura, psychosocial ken relihiyoso nga aspeto ti “radikalisasyon” nga agtentennag kano iti “naranggas nga ekstremismo.”

Kangrunaan a naipasidong daytoy iti panangiwardas ti Department of Interior and Local Government (DILG) kabadang ti dadduma pay nga ahensya ti gubyerno. Tinudo ti plano ti innem a “bulnerable a sektor” a kasapulan a serken tapno malapdan ti “radikalisasyon.” Dagitoy a sektor ket ti komunidad, dagiti detenido a pulitikal ken addaan kaso a “terorismo,” lider-relihiyoso, unibersidad, agus-usar ti social media, overseas Filipino workers ken dagiti relihiyoso nga iskolar.

Ti NTF-Elcac ket agak-akem ti mayor a rebbengen kas kangrunaan nga ahensya a koordineytor kadagiti programa a maipatpatungpal iti sidong ti plano. Nakapakete daytoy iti maaw-awagan a “whole-of-nation approach,” ti pundasyon ti pannakabukel ti ahensya. Ti NTF-Elcac ti makisarsarita kadagiti klaster ken dagiti pangrehiyon ken lokal a task force tapno ipatungpal ti NAP P/CVE.

Iti aktwal, naaddaan sukog ti plano iti panangipatungpal ti Retooled Community Support Program (RCSP) idi Oktubre 2019 iti bileg ti maysa a memorandum ti DILG tapno serken dagiti komunidad. Iti balangkas met ti NAP P/CVE a naipatungpal ti Enhanced Comprehensive Local Integration Program (E-CLIP) idi Marso 2020 tapno puntiryaen met ti “nagsubli (iti salinong ti linteg”) wenno dagiti nakakulong.

Kadagiti unibersidad ken eskwelaan, agiyar-aramid ti NTF-Elcac ken dagiti ahensya iti seguridad ti estado kadagiti porum, leadership training, camping, trabaho a kooperasyon ken dadduma pay nga interbensyon kadagiti unibersidad tapno talantanen ti “radikalisasyon.”

Maysa a rupa daytoy ti kampanya a Red-tagging a mangpawpawil iti wayawaya nga agpanunot, agorganisa, agiyebkas ken dadduma pay a karbengan dagiti kabataan. Adda met dagiti kaso ti panangkumpiskar ti NTF-Elcac kadagiti libro iti librerya dagiti unibersidad a kuna daytoy a mangituntunda ti “radikalisasyon.”

Kakarwan, pagtamtameden ti militar ken NTF-Elcac dagiti administrador dagiti eskwelaan tapno sumurot iti kumpas da. Iti kastoy a balangkas a sinerrek ti AFP ti maysa a katulagan iti kooperasyon iti University of the Philippines. Daytoy met ti kangrunaan a panggep ti NTF-Elcac idi inpauneg daytoy ti COCOPEA, grupo dagiti pribado nga eskwelaan, kas paset ti komite daytoy.

Nasaknap a buteng ken troma ti pinataud ti doktrina a CVE iti kabataan ken umili. Gapu ditoy, adu ti aggudeng nga agiyebkas ti upinyon iti social media ken agsarita para kadagiti basaran a karbengan da.