Masobra sa 7,000 ka mamumugon, lakip ang pamatan-on kag iban pa nga demokratikong sektor, ang nagmartsa padulong sa Mendiola sa Manila sadtong Mayo 1, Adlaw sang Pangabudlay. Nagapanawagan sila nga ipasaka ang sweldo sa makabuhi nga lebel sa bug-os nga pungsod. May amo man nga hublag ang mga mamumugon sa mga syudad sang Baguio, Angeles, Calamba, Naga, Cebu, Iloilo, Roxas, Bacolod, kag Davao, kag sa banwa sang Rosario sa Cavite.

Suno sa mga mamumugon, nagakadapat lang nga pasakaon ang minimum nga sweldo sa makabuhi nga lebel nga ₱1,200 tungod sa nagasaka nga bili sang pangabuhi kag pila ka dekada nga gin-ipit ang pagsaka sang sweldo. Sa subong, yara sa 36% tubtob 54% ang ginabaton nga sweldo sang mga mamumugon kumparar sa ila kinahanglanon. Ginagiit nila nga bungkagon ang mga regional wage board nga nagatalana sang sensilyo nga pagsaka. Panawagan man nila ang pagtapos sa kontraktwalisasyon kag pagpangapin sa kinamatarung sa unyon, lakip ang kinamatarung sa pag-organisa kag kolektibong pakig-negosasyon.

₱200 across-the-board

Kadungan sang panawagan sa makabuhi nga sweldo, ginaduso sang National Wage Coalition (NWC) ang pagpasar sang laye nga ₱200 dugang nga sweldo para gilayon nga hatagan sang kasulhayan ang mga mamumugon. Ginasulong sang koalisyon ang rekomendasyon sa atubang sang pila ka tuig nga pagka-atrasar sang mga rekomendasyon nga dugang nga sweldo sa Kongreso kag Senado.Kon maduso, ini ang una nga pungsodnon nga saka-sweldo nga ipaagi sa layi sa nagligad nga 36 ka tuig. Ginabug-os ang NWC sang 30 ka mga sentro sang pamugon, lakip ang KMU.

Pareho sang ginasigahum, ginsulit lang ni Ferdinand Marcos ang sabat nga “tun-an” ang ginproponer nga dugang sweldo. Kabaliskaran ini sa kadasigon sa pagpasar sang rehimen sang mando ehekutibo nga nagadugang sang ₱200 nga inadlaw nga alawans sa mga soldado kag pulis subong nga tuig.

Diskriminasyon sa sweldo sa kaumhan

Makabuhi nga sweldo man ang panawagan sang mga mamumugon sa agrikultura sa Adlaw sang Pangabudlay. Suno sa Unyon ng mga Manggagawa sa Agrikultura (UMA), kon manubo na ang sweldo sa kasyudaran, mas manubo pa ang sweldo sang mga mamumugon sa uma sa pihak sang malahalon nga papel nila sa produksyon sang pagkaon.

Daw kasubong nga mga “third class citizen” ukon manubo nga klase sang pumuluyo ang mga mamumugon sa kaumhan, suno sa UMA.Sa Eastern Visayas, halimbawa, yara sa ₱390 lang ang sweldo sang mga mamumugon sa agrikultura, nga 32.5% lang sang makabuhi nga sweldo. Sa Negros, kon diin makita ang mga dalagko nga asyenda, linibo ka mga mamumugon sa kampo ang nahigot sa sistema nga pakyaw nga mas manubo pa sa gintalana nga minimum nga sweldo ang ginabaton para sa mga mamumugon sa agrikultura.

Dugang sa barat nga sweldo, nagaatubang man sila sang indi makatawo kag peligroso nga mga kondisyon sa trabaho. Masami sila nga nabulad sa makatalagam nga mga kemikal, grabe nga init sang adlaw kag iban pa nga sitwasyon nga makapalain sa ikaayong lawas.

Hangkat sa mga mamumugon nga Pilipino

Sa pahayag sang Partido Komunista ng Pilipinas sa Adlaw sang Pangabudlay, gina-engganyo sini ang mamumugon nga Pilipino nga mag-isa kag maghulag para magserbe nga malig-on nga haligi, malapad nga pwersa kag nagapamuno sa paghimakas sang pumuluyong Pilipino para sa pungsodnon kag sosyal nga kahilwayan.

Dapat nila isulong ang militante nga mga paghimakas unyon para ipakigbato ang makabuhi nga sweldo, kag pangapinan ang demokratikong interes kag kaayuhan sang mga mamumugon, siling sini. Dapat nila uyatan kag gamiton ang welga bilang armas sa ila mga paghimakas pang-ekonomiya kag pangpulitika.

Siling sang Partido, dapat ibutang sang mga Pilipinong mamumugon sa unahan sang mga paghimakas pungsodnon ang ila hanay, lakip ang pagpakig-away batuk sa korapsyon sang nagahari nga rehimen, mga pasistang krimen, wala-untat nga pagsaka sang presyo sang mga balaklon kag patarasak nga importasyon sang bugas. Dapat nila palanugon ang panawagan para sa matuod nga reporma sa duta kag pungsodnon nga industriyalisasyon kag pungsodnon nga demokrasya.

Dapat man nga pakig-awayan ang Balikatan kag mga war games nga pagpanggarit-garit sang gyera sang US kag ang pagpakapapet sang rehimen Marcos sa iya imperyalistang amo. Nagapanawagan man ini sa mga Pilipinong mamumugon nga ipakita ang pagpakig-isa sa pumuluyong Palestino batuk sa henosidyo sang Zionistang estado sang Israel.