Barikada sang pumuluyong Aeta sa Mt. Pinatubo. Nagtukod sang barikada sadtong Abril 18 ang komunidad sang Aeta sa Mt. Pinatubo Sityo Tarukgan, Barangay Santa Juliana, Capas, Tarlac agud igiit ang kinamatarung nila sa duta. Pila ka tuig nga wala nabayaran sang husto ang mga tumandok sang mga ahensya sang estado sa turismo kag wala man sila ginbuligan sang NCIP. Indi makatarungan nga gin-aresto ang pila sa ila sang mga pulis kag ginpasakaan sila sang kaso nga obstruction of public passage kag indi otorisado nga pagsulod sa protektadong lugar.

Balik-trabaho sa Bataan. Naduso sang mga mamumugon ang pamunuan sang FCF Manufacturing Corporation nga ibalik sa trabaho ang mga ginpaidalum sini sa istatus nga “forced leave” sadtong Abril 19. Nagapanawagan ang grupo sa kumpaniya nga untaton ang ginatawag nga “paghataw sa trabaho” kag iban pa nga iskema sang pag-imbak sang hinimo nga mga produkto tungod ini ang nagatulod sang patakaran nga forced leave.

Parada sa dagat batuk sa offshore wind farm sa Ilocos. Naglunsar sang parada ang mga mangingisda sa Pagudpud sa Ilocos Norte sadtong Abril 20 agud pamatukan ang plano nga pagtukod sang BuhaWind Offshore Windfarm sa baybayon sang Pasuquin, Burgos, Bangui, kag Pagudpud. Sa tatlo ka tuig nga konstruksyon sang wind farm, ginadumilian nga makapalawod malapit diri ang mga mangingisda.

Hublag kontra Prime Water sa Bulacan. Naglunsar sang noise barrage ang lain-lain nga grupo sadtong Abril 25 agud kundenahon ang palpak nga serbisyo sa tubig sang Prime Water sa San Jose Del Monte City sa Bulacan. Sugod sang gintukod ang joint venture ukon sosyohanay sang Prime Water kag sang San Jose Del Monte Water District sadtong 2018, wala-tuo na ang nangin problema sang mga residente kasubong sang atrasado kag mahinay nga ilig sang mahigko kag indi pwede inumon nga tubig, kag tuman ka mahal nga balayran sa serbisyo.