Nalista ang duha ka kaso sang pag-abdak sa mga lider-masa sa Southern Tagalog sang nagligad nga duha ka semana. Magluwas diri, may yara man sang mga paglapas sa tawhanon nga kinamatarung ang mga soldado kag pulis sa Isabela, Quezon kag Metro Manila.

Sa Batangas, gin-abdak sang mga pwersa sang estado si Pauline Joy Banjawan, organisador sang Kadamay-Southern Tagalog nga nagapangampanya para sa Bayan Muna, sadtong Abril 26. Duha ka adlaw pagkatapos ang pagkadula, natultolan siya sa istasyon sang pulis sa Santo Tomas, Batangas.

Nahibaluan nga gin-abdak siya sang 59th IB, ginpaidalum sa isa ka adlaw nga tortyur antes gindala sa mga pulis. Ginpasakaan si Banjawan sang kaso nga illegal possession of firearms and explosives.

Sa Rizal, ginkuha kag ginbilanggo sang mga soldado sang 80th IB ang mangunguma nga si Jonathan del Castello sadtong gab-i sang Abril 27 sa Tanay. Suno sa biktima, ginpaidalum siya sa interogasyon kag ginpahog nga patyon sang mga soldado. Gin-akusaran siya nga ang dala niya nga pagkaon sang siya gindakup idul-ong niya sa Bagong Hukbong Bayan (BHB). Ginbuhian lang siya sang 80th IB sang kaagahon sang Abril 28.

Istraping. Sa Isabela, ginpalukpan sang mga elemento sang 502nd IBde ang lima ka pungsodnon nga minorya nga Ifugao samtang nagapangisda sadtong Abril 21 sa Sityo Sapiot, Barangay Tappa, San Mariano.Tatlo sa mga sibilyan ang gilayon nga luwas nga nakapauli samtang duha ang indi gilayon mahibaluan kon diin. Nagpangtiro man ang 86th IB sa Barangay Dicamay Dos, Jones sadtong Abril 20.

Militarisasyon. Sa Quezon, indi magnubo sa 2,000 ka soldado sang 2nd ID ang ginbubo sa focused military operation (FMO) sa apat ka barangay sa Lopez sugod sadtong Abril 21. Wala-tuo ang tsekpoynt nga gintukod sang militar kag pulis nga nagpaatrasar sa palangabuhian, pagpanguma kag hilway nga paghulag sang mga residente. Ginapangayuan sang sedula ang tanan nga mga nagaagi sa tsekpoynt.

Pagpang-ipit. Ginpunggan sa paluparan kag gindumilian nga magsulod sa Pilipinas sadtong Abril 26 si Gordon Mutch, Amerikano nga myembro sang Baltimore Committee for Human Rights in Philippines (BaltCHRP).Nagkadto sa Pilipinas si Mutch para mag-obserbar sa eleksyon 2025 kag makita ang kahimtangan sang mga Pilipino sa idalum sang rehimen Marcos. Gin-deteni siya sang Philippine Bureau of Immigration sang apat ka oras, antes siya gindeport sa US tungod sa “kontra gobyerno niya nga aktibidad.”