Makita ang pinakadako nga isip sang mga mamumugon nga Pilipino sa Southern Tagalog. Sa kabilogan, 18% sang bug-os nga pwersa sang pangabudlay sang pungsod yara sa rehiyon. Nagapangaduha diri ang National Capital Region kon diin naga-isip sa 10.4 milyon ang mga mamumugon. Nakakonsentrar sa Calabarzon ang 12.1 milyon sa 14.2 milyon nga pwersa sang pangabudlay sang rehiyon.

Indi pa lakip diri ang wala ginakabig sang estado nga pwersa sang pangabudlay kasubong sang mga kabulig sa balay, retirado, out-of-school nga pamatan-on, nag-gradweyt pero wala sang masudlan nga trabaho, may deperensya sa lawas, kag mga wala nagapangita sang trabaho sa sulod sang anum ka bulan. Sa pinakaulihi nga ginpaguwa nga sarbey sang reaksyunaryo nga estado, ang “labor force participation rate” ukon porsyento sang populasyon nga edad 15 pasaka nga kabahin sa pwersa sang pangabudlay 64.8% lang sa Calabarzon kag 64.2% sa Mimaropa.

Sa mga may trabaho, sangkatlo (1/3) ang gina-kategorya nga self-employed ukon nagapang-empleyo sa kaugalingon. Magluwas diri, may 7% nga gina-isip sa employed apang wala sang sweldo ukon wala ginabayaran ang pangabudlay. Kon isahon ang duha ka kategorya, 35% ini sang pwersa sang pangabudlay nga may isip nga 3.2 milyon sa bug-os nga rehiyon. Kon idugang ini sa opisyal nga isip sang wala sang trabaho, may makahalawhaw nga isip nga 3.7 milyon nga wala sang pormal nga pangabuhian sa kubay sang 9.2 milyon nga pwersa sa pangabudlay sang Southern Tagalog. Dugang sa ila ang yara sa 1.4 milyon nga mamumugon nga underemployed ukon kulang sa trabaho.

Manubo nga sweldo

Ang ginaswelduhan kag may sweldo nga mamumugon sa rehiyon nagabug-os sang 64% sang pwersa sang pangabudlay nga may trabaho. Yara sa pribado nga kumpaniya ang 4.4 milyon, samtang empleyado sa gobyerno ang 777,000.

Tuman ka nubo kag indi makabuhi sang pamilya ang sweldo nga ginabayad sang kapitalista kag burukrata kapitalista sa mga mamumugon, sa pribado man ukon sa sektor publiko. Sa Calabarzon ang minimum nga sweldo sadtong Mayo 2024 ₱522 lang kada adlaw samtang ang gintalana nga makabuhi nga sweldo para sa 5 ka tawo nga pamilya ₱1,122 ang adlaw. Sa Mimaropa, makaluluoy nga ₱352 kada adlaw ang minimum nga sweldo sadtong Marso 2024, malayo sa gintalana nga makabuhi nga sweldo para sa 5 ka tawo nga pamilya nga ₱1,213. Daw patakaran na sang reaksyunaryong gobyerno ang indi makatawo nga kita sang mamumugon.

Minilyon ang mga mamumugon apang gamay nga isip lang ang organisado sa mga unyon nga mayor nga organisasyon nga magasulong sang ila kinamatarung sa makatarungan nga sweldo. Sa lista sadtong 2021-2022, sa bilog nga isip nga 34,543 nga kumpaniya sa pungsod nga may pinakanubo nga 20 ka mamumugon pasaka, 1,464 kumpaniya ukon 4.2% lang ang may rehistrado nga unyon. Mas gamay ini sa daan nga 6.3% sadtong 2018.

Terorismo ang sabat sang rehimen sa pagpakig-away sang sahing mamumugon

Ang daan nga pasista nga pagpanumpo sa pag-unyon sang mga mamumugon ginpagrabe pa sang lubos nga terorismo sang estado paagi sa pagpasar bilang layi sang Anti-Terrorism Law. Ang reaksyonaryong estado ang nagapatigayon sang terorismo batuk sa kinaandan nga pumuluyo ilabina batuk sa mga mamumugon, aktibista, mga tawo nga may makatarungan nga adbokasiya kag mga kritiko sang gobyerno. Lapnagon nga ginagamit sang mga militar, pulis kag ahensya sang estado kaangay sang NTF-Elcac ang Red-tagging nga nagapuntirya sa lider kag aktibista nga katapo sang unyon. Paghanda ini para patigayunon ang pagpatay, pag-abdak kag pagdula sa ila. Matingkad nga halimbawa sini ang operasyon sang PNP-Calabarzon sa ginatawag nga Bloody Sunday sadtong Marso 7, 2021 nga nagpatay sa siyam ka lider kag organisador lakip ang lider-mamumugon nga si Manny Asuncion. Pagkatapos sang pila ka semana, ginpatay man si Dandy Miguel, presidente sang unyon sa Fuji Electronics sa Laguna.

Sadtong temprano nga bahin sang 2023, isa ka delegasyon sang International Labour Organization (ILO) ang nagpatigayon sang imbestigasyon sa kahimtangan sang mga unyon kag nagpahayag sang pagkundena sa dalagan sang panghuna-huna sang reaksyonaryong gobyerno nga permi ginaangot ang unyonismo sa komunismo. Halin 2016, 76 ka unyonista kag organisador ang nalista nga ginpatay sang mga pwersang pangseguridad sang estado. Bisan pagkatapos ang misyon sang ILO sa pungsod, apat pa ka mga unyonista ang gin-report nga ginpatay.

Halin sa Kalatas, Mayo 2025.