Ginhatagan sang pagsaludo sang Partido Komunista ng Pilipinas kag Bagong Hukbong Bayan (BHB)-Negros Island (Apolinario Gatmaitan Command) ang pito ka Pulang hangaway sini nga napatay sa “overkill” nga armadong operasyon sang Armed Forces of the Philippines (AFP) sadtong Abril 27 sang aga sa Barangay Tapi, Kabankalan City, Negros Occidental. Napatay ang Kabankalan 7 samtang nagatungod sang bulawanon nga katungdanan sang padayon nga pagsulong sa armadong paghimakas, pagpalapad sa baseng masa kag agraryong rebolusyon sa isla.

Ang pito ka namartir amo sanday Reniel Locsin Cellon (Ka Randy), Mary Jane Magquilat (Ka Shonie), Charity Amacan (Ka Mayang), Johnrey Mejares (Ka Jai), Glenda Tinio Mejares (Ka Glendyl), Ka Pitong, kag Dee Supelanas (Ka Dahlia). Si Supelanas sadto lider estudyante sang UP-Cebu. Tatlo sa mga martir mga senior citizen kag may kondisyon medikal nga rason sang ila kabudlayan nga maghulag.

Sadtong Abril 29, nagtipon kag ululupod nga nagsindi sang kandila ang mga pamatan-on nga Cebuano sa University of the Philippines (UP)-Cebu agud hatagan sang pagsaludo si Supelanas. Antes nagserbe bilang Pulang hangaway, si Supelanas isa ka aktibista kag lider-estudyante. Ginpamunuan niya ang mga kampanya para sa edukasyon, sosyal nga serbisyo, demokratikong kinamatarung kag pagpakigbato sa tiraniya kag pasismo.

Nagpaabot sang pag-unong ang Partido kag BHB-Negros Island sa mga pamilya, abyan kag kaupod sang Kabankalan 7. “Samtang nagatangis, gamiton ninyo ini nga higayon agud mas nga pandayon ang rebolusyonaryong espirito, bilang pamaagi sang paglab-ot sang hustisya sa aton mga martir,” suno kay Ka Marco Valbuena, upisyal sa impormasyon sang Partido.

Ginbatikos man ni Valbuena ang pagpang-insulto sang National Task Force-Elcac kag AFP sa handurawan ni Supelanas. Ginapaguwa sang mga pwersa sang estado nga siya “biktima sang manipulasyon” sang Partido kag sang BHB, sa pihak sang kamatuoran nga linibo ka pamatan-on ang nagapakigbahin kag magapakigbahin pa sa rebolusyonaryong kahublagan agud bag-uhon ang garuk nga sosyedad tungod sa ila pagpalangga sa pungsod.

Samtang, nagapanawagan sang imbestigasyon ang grupo sa tawhanon nga kinamatarung nga Kapatid sa pagpatay sa Kabankalan 7. Ginaduso nila ang imbestigasyon tungod duda sila kon “matuod bala nga engkwentro militar ang natabo ukon hungod nga pagpatay.” Ang ginakatingalahan sang grupo nga wala man lang sang isa nga nakaluwas halin sa pito ka Pulang hangaway.

Siling sini, labi nga mas mabaskog kag superyor ang numero kag armas panglupok sang AFP batuk sa nagapahuway nga mga Pulang hangaway, apang nga-a wala na lang sila gin-aresto? “Nga-a wala sang bisan isa sa ila – ukon bisan tanan sila – ang gin-aresto kag ginpasakaan sang kaso? para mangin mga bilanggong pulitikal imbes nga tubtob katubtuban nga ginpahipos?” suno pa sa grupo.