Dala ang mga bandera sang National Democratic Front (NDF) kag mga alyado nga organisasyon sini, naglunsar sang kilat nga rali ang ginatos ka katapo sang lain-lain nga rebolusyonaryong grupo sa Divisoria sa Manila sadtong Abril 29 agud saulogon ang anibersaryo sang NDFP. Panawagan nila: “Armadong rebolusyon ang matuod nga solusyon!” Ginkomemorar sang NDFP ang ika-52 nga anibersaryo sini sadtong Abril 24.

Nagsab-it sang mga istrimer ang Christians for National Liberation (CNL) kag Revolutionary Council of Trade Unions (RCTU) malapit sa Malacañang nga may panawagan sang pagsulong sang rebolusyon.

Suno kay Elias Dipasupil, sekretaryo heneral sang NDFP, ang NDFP bilang organisasyon sang nagahiliugyon nga prente para sa rebolusyonaryong armadong paghimakas. “Samtang ginakilala ang lain-lain nga porma sang paghimakas, ginatib-ong sang NDFP ang armadong paghimakas bilang nagapanguna nga porma agud mabugras ang garuk nga mala-kolonyal kag mala-pyudal nga sistema samtang amat-amat kag tayuyon nga ginatukod ang bag-o nga sistema sa pagpauswag sang mga organo sang gahum pangpulitika sa kaumhan.”

Gina-engganyo niya ang mga kaalyado nga organisasyon nga magpalapad kag magpabaskog. “Sa subong nga pangkalibutanon kag pungsodnon nga krisis, tuman ka kinahanglanon ang mga organisasyon masa para sa paghimakas sang pumuluyong Pilipino batuk sa pagpamigos kag paghimulos kag sa pagtukod sang katilingban nga nagakadapat para sa ila, nga nagaserbe sa ila mga interes,” siling niya.

Nagpahayag naman sang pagpanamyaw ang lain-lain nga organisasyon halin sa lebel rehiyon tubtob pungsodnon, kag ang mga partido sa luwas sang pungsod para sa anibersaryo sang NDF. Lakip diri ang PKP, BHB, mga tsapter sang NDF sa Southern Tagalog kag Ilocos, NDF-Palawan, NDF-International, Liga ng Agham para sa Bayan, Makabayang Kilusan ng Bagong Kababaihan, RCTU, Kabataang Makabayan kag KM-Southern Tagalog, Compatriots, CNL kag Pambansang Katipunan ng mga Magbubukid.

Gintamyaw man ang NDF sang Friends of the Filipino People in Struggles (FFPS) kag mga tsapter kag organisasyon sini. Nagpatigayon ang FFPS sang mga aktibidad kag pagtipon sa lain-lain nga pungsod sadtong Abril 26 bilang pagsaulog. Nagpaabot man sang pagpanamyaw ang International Bureau sang Partido Komunista ng Turkey (TKP-ML) kag Cairde na Filipínigh Committee sang Anti-Imperialist Action Ireland.