Kada may Pulang hangaway sang Bagong Hukbong Bayan nga halin sa sektor sang pamatan-on-estudyante nga nagakapatay sa inaway (ukon hungod nga ginapatay) sang Armed Forces of the Philippines (AFP), wala sang iban nga ginangasal ang National Task Force (NTF)-Elcac kundi ang kakinahanglanon nga sumpuon ang ideya kag panghuna-huna sang pamatan-on sa mga unibersidad. Ginasiling nila nga pamaagi ini agud punggan ang pagpakigbahin sang mga pamatan-on sa armadong paghimakas ukon ginabansagan sini nga “radikalisasyon” ukon “terrorist grooming.”

Ang taktika nga ini sang AFP kag NTF-Elcac naghalin kag yara sa balayon sang doktrinang “countering violent extremism” (CVE ukon “pag-away sa mapintas nga ekstremismo”) sang US. Ginakabig ang “ekstremismo” ukon mga “pinaka-grabe nga ideolohiya” ang ano man nga ideya nga ginakabig nga “pamahog” sa nagahari nga sistema. Ginatabon ang CVE sa pagsumpo sa tanan nga dagway sang pagpahayag kag pakig-away sa estado. Ginapaguwa sini nga ang “ekstremismo” ang nagaduso sa pumuluyo nga makig-away lakip ang lehitimo kag makatarungan nga pag-armas sang pumuluyo batuk sa reaksyonaryo nga nagahari nga estado. Indi simple nga mga ideya kag pagpati ang nagabunga sini, taliw-as sa ginapaguwa sang CVE, kundi ang mismo kongkreto nga mga kundisyon sang pagpamigos, paghimulos kag kalakasan sang estado.

Ang doktrina kag programa nga CVE

Ang CVE una nga ginpalig-on sa idalum sang administrasyon Obama sang US sadtong 2014. Gingamit ini sadtong panahon sang kampanya kontra-Muslim ukon pagpalapnag sang Islamophobia, kag kadungan nga gintarget ang mga progresibong aktibista pangpulitika. Ginapaguwa sang doktrina nga ang mga Muslim kag mga aktibista “mapintas sa pinaka-kaibuturan.”

Gingamit ang CVE para sa pagpulis kag pagpanilag sa mga lider sang komunidad para i-profile ukon maghimo sang laragway sang mga indibidwal base sa ila hulag ilabina sa hambalanon sang relihiyon, lahi kag pulitika. Katuyuan sini nga bantayan ang “radikalisasyon” sang mga indibidwal nga ginasiling yabe para magdangat sa “terorismo.” Ginatawag man ini bilang “soft counterterrorism.”

Wala pa man sang ginhimo ang indibidwal, pwede na nga bansagan nga “terorista” ang iya ugali kag dalagan sang panghuna-huna. Lapas ini sa mga sandigan nga tawhanon nga kinamatarung pareho sang kinamatarung sa pribasiya, pagpahayag, paghulag, pag-organisa kag iban pa. Nagatanum ini sang kahadlok kag nagabunga sang “self surveillance” ukon “pagbantay sa kaugalingon” agud indi masuspetsuhan, kag nagaguba sa mga komunidad.

Pagpanghalit sang CVE sa Pilipinas

Sadtong 2019, gintukod kag ginpalig-on sang gobyerno sa Pilipinas paagi sa Anti-Terrorism Council sa idalum sang Human Security Act ang isa ka National Action Plan on Preventing and Countering Violent Extremism (NAP P/CVE). Nakasulat bilang katuyuan sini ang pagdumala sa mga programa nga nagasabat sa pangpulitika, pang-ekonomiya, pagkultura, psychosocial kag relihiyon nga aspeto sang “radikalisasyon” nga nagadangat sa siling “mapintas nga ekstremismo.”

Ginbutang ini mayor sa pagdumala sang Department of Interior and Local Government (DILG) kabulig ang iban pa nga ahensya sang gobyerno. Gintumod sang plano ang anum ka “bulnerableng sektor” nga kinahanglan sudlon agud punggan ang “radikalisasyon.” Ang mga sektor nga ini amo ang komunidad, mga detenidong pulitikal kag may kaso nga “terorismo”, lider-relihiyoso, unibersidad, nagagamit sang social media, overseas Filipino workers kag mga relihiyosong iskolar.

Nagatungod sang yabe nga katungdanan ang NTF-Elcac bilang nagapanguna nga ahensya nga koordineytor sang mga programa nga ginapatuman sa idalum sang plano. Nakapakete ini sa ginatawag nga “whole-of-nation approach,” ang pundasyon sang pagkatukod sa ahensya. Ang NTF-Elcac ang nagapakig-estorya sa mga klaster kag mga pangrehiyon kag lokal nga task force para ipatuman ang NAP P/CVE.

Sa aktwal, nakalaragway ang plano sa pagpatuman sang Retooled Community Support Program (RCSP) sadtong Oktubre 2019 resulta sang isa ka memorandum sang DILG agud sudlon ang mga komunidad. Sa balayon man sang NAP P/CVE ginpatuman ang Enhanced Comprehensive Local Integration Program (E-CLIP) sadtong Marso 2020 para naman targeton ang “nagbalik sa sabak sang gobyerno” ukon mga nabilanggo.

Sa mga unibersidad kag eskwelahan, nagapatigayon ang NTF-Elcac kag mga ahensya sa seguridad sang estado sang mga porum, mga leadership training, camping, hilikuton kooperasyon kag iban pa nga pagpasilabot sa mga unibersidad agud talakayon ang “radikalisasyon.”

Isa ka dagway sini ang kampanyang Red-tagging nga naga-ipit sa kahilwayan nga manghuna-huna, mag-organisa, magpahayag kag iban pa nga kinamatarung sang mga pamatan-on. May yara man sang mga kaso sang pagpangkuha sang NTF-Elcac sang mga libro sa librarya sang mga unibersidad nga siling nagadulot sang “radikalisasyon.”

Pinakalubha, ginapayaob sang militar kag NTF-Elcac ang mga administrador sang mga eskwelahan para magsunod sa ila kumpas. Sa amo sini nga balayon ginpasulod sang AFP ang isa ka kasugtanan sa kooperasyon sa University of the Philippines. Amo man ang nagapanguna nga katuyuan sang NTF-Elcac sang ginpasulod ang COCOPEA, grupo sang mga pribadong eskwelahan, bilang kabahin sang komite sini.

Lapnagon nga kahadlok kag troma ang gintuga sang doktrinang CVE sa pamatan-on kag pumuluyo. Tungod sini, madamo ang nagapangduha-duha nga magpahayag sang opinyon sa social media kag maghambal para sa ila sandigan nga mga kinamatarung.