Ginabuyagyag sang nagahari nga sistema ang kaugalingon sini nga kagarukan sa nagakatabo subong nga reaksyonaryong eleksyon. Sa nagligad nga mga binulan sang pagpangkampanya para sa piniliay sa senado, kongreso kag mga lokal nga gobyerno, nasaksikhan sang pumuluyo kon paano ang eleksyon sa Pilipinas dominado sang mga dinastiya kag partido nga nagatiglawas sa interes sang mga imperyalistang dumuluong kag pipila lang kag indi sang mayoriya sang pumuluyo.

Ang eleksyon 2025 ginaharian sang pinakagaruk nga mga hubon sang nagahari nga sahi: sang mga Marcos kag Duterte, nga lunsay bat-ulan sa korapsyon, pagpangsumpo kag pagpamigos sa pumuluyo, kag sa pagka-sunod-sunoran sa mga dikta sang imperyalistang dumuluong. Pareho sila subong nga nagadis-uganay para mauyatan ang gahum sa katuyuan nga palaparon ang ila manggad kag burukratiko nga prebilihiyo, kag makapalagyo sa mga salabton sa mga krimen nila sa pumuluyo.

Luyag sang hubon ni Marcos nga harian ang kongreso, senado kag mga LGU para mas pa nga mapahugot ang kontrol sa poder kag tugahon ang kondisyon para makapadugay sa gahum ang ila dinastiya lapaw sa 2028. Ang pagkabilanggo kay Duterte sa International Criminal Court kon diin naga-atubang siya sang krimen batuk sa katawhan ginhatagan ligwa ni Marcos sa pagtinguha nga idiskaril ang mga karibal niya sa pulitika. Wala-tuo ang palagwaon kag gimik sang rehimen Marcos agud makuha ang malapad nga suporta sang pumuluyo. Apang, napaslawan ini nga tabunan ang malala nga krisis sang kapigaduhon dulot sang wala sang katapusan nga pagsaka sang presyo sang mga balaklon, manubo nga sweldo kag kawad-on sang palangabuhian.

Nagalagas ang mga Duterte nga mapasulod ang bastante nga isip sang ila mga tinawo sa Senado, mayor para upangan ang impeachment kay Vice President Sara Duterte, nga akusado sa maanomaliya nga paggasto sa ginatos ka milyon ka piso nga badyet sang gobyerno. Agud kuhaon ang simpatiya sang pumuluyo, ginapaguwa nila nga sila mga biktima sang pangpulitika nga pagpang-ipit ni Marcos. Apang napaslawan sila nga panason ang preska nga handumanan sang masa sang malaparan nga kalakasan kag pag-antus sa idalum sang nagligad nga rehimen, kag tabunan ang singgit sang pumuluyo para sa hustisya sa tanan nga biktima sang pasistang krimen sang tirano nga Duterte.

Ginapakita sang dominasyon sang duha ka garuk nga hubon sa eleksyon 2025 ang makasuluka nga piniliay sa idalum sang mala-kolonyal kag mala-pyudal nga sistema sa Pilipinas. Paindisanay ini sang pipila nga mga gamhanan. Wala sang matuod nga espasyo ang pag-entra sang masang pigos kag ginahimuslan. Ginapaguwa nga demokratiko ang eleksyon, bisan ang kamatuoran, para lang ini sa mga burukratikong kapitalista nga mga burgesya kumprador kag agalon mayduta.

Sa nagligad nga mga binulan, nagtuga sang mabaskog nga gahod ang pagpakigbahin sang mga demokratiko, progresibo kag makibanwahanon nga kandidato kag partido sa eleksyon sa senado kag kongreso. Gindala nila sa kampanyang eleksyon ang mga panawagan para sa makabuhi nga suhol kag sweldo, matuod nga reporma sa duta, pagpanubo sang presyo sang mga balaklon, libre nga serbisyo pang-ikaayong-lawas kag edukasyon, trabaho, kinamatarung, kahilwayan kag iban pa nga demanda sang pumuluyo. Naghalin ang kadam-an sa ila sa kubay sang mga mangunguma kag mamumugon, mga imol nga taga-syudad, mangingisda, drayber kag iban pa nga pigos nga sektor.

Kabaliskaran sini, ang mga reaksyonaryong pulitiko nagapabungol-bungol sa mga singgit sang pumuluyo. Kung mag-postura man nga makamasa, ini tubtob lang sa eleksyon. Gamit ang ila madalom nga bubon sang manggad, ginadominahan man nila subong ang piniliay party-list kag ginakuhaan sang lugar ang mga partido nga matuod nga nagatiglawas sa mga imol nga sektor sang katilingban.

Ginatos ka milyon ka piso ang gasto nila para sa mga pasayod sa radyo kag telebisyon, agud pun-on ang mga pader kag poste sang ila mga poster kag mangbudbod sang mga kamiseta nga may tatak sang ila hitsura kag ngalan. Kadungan sini, nagtinuhaw nga daw ohong ang mga sarbey para impluwensiyahan ang panghuna-huna sang pumuluyo. Upod sini ang paggamit sang mga bayaran nga taga-impluwensiya sa social media agud iduso ang talakayan pabor sa interes sang mga pulitiko nga partido. Ginatos ka milyon ka piso ang segurado nga magabaha pa samtang nagahilapit ang mismo adlaw sang piniliay para ipangbakal sang boto.

Wala-tuo ang mga kaso sang pagpatay kag kalakasan sang mga nagasumpunganay nga pulitiko sa lain-lain nga bahin sang pungsod. Kalakasan naman sang estado ang ginagamit sang mga ahente sang militar, pulis kag NTF-Elcac para ipiton ang mga progresibong kandidato kag partido, sa dagway sang pagpangtiktik, pagpasaka sang himo-himo nga kaso, pag-aresto kag pagbilanggo, kag pagpangkugmat sa ila mga pwersa kag taga-suporta.

Segurado nga liwat nga gamiton sang nagapungko sa gahum ang dekompyuter nga pag-isip sa mga boto agud magpabor sa ila ang mangin resulta sang piniliay. Gani nagabaskog ang panawagan para sa mano-mano nga pag-isip sang boto nga magahatag kuntani sang dako nga kasegurohan sa husto nga pag-isip sang mga boto. Apang, padayon ini nga ginabalewala sang Comelec. Ginatantya nga dako nga isip sang mga Pilipinong migranteng mamumugon ang indi makaboto tungod sa ginhimo nga online voting.

Bisan diin man sa Marcos ukon mga Duterte ang magdaog sa maabot nga piniliay, segurado nga padayon kag mas magdasig ang pagkagaruk sang reaksyonaryong estado, sa atubang sang wala sang kasolbaran nga krisis sang nagahari nga sistema. Padayon ini nga magapatuman sang mga programa kag laye nga pabor sa interes sang imperyalismong US, sang dalagko nga dumuluong kumpaniya kag sang mga nagahari nga sahi, nga magadala sang mas labi pa nga pag-antus sa pumuluyo. Segurado nga magalala pa ang korapsyon sa pagbawi sang mga burukrata kapitalista sang ginatos ka milyon nga ginkapital nila sa eleksyon.

Dapat padayon nga palig-unon ang solidong organisasyon sa kubay sang pumuluyong Pilipino kag magpanikasog sa dalan sang militanteng paghimakas, ilabi na sa pag-atubang sang mga dalagko nga away sa maabot nga mga binulan kag tuig, lakip ang pagbukas sang pag-hearing sa Senado angot sa impeachment ni Sara Duterte kag pagbista kay Rodrigo Duterte sa ICC,subongman batuk sa nagasingki nga pagpasilabot militar sang US sa Pilipinas kag pagpanulsol sang gyera kontra sa China, sa pagpakapapet ni Marcos, sa kontra-pumuluyo kag paantus nga patakaran, korapsyon, pagka-inutil kag pasistang pagpanumpo kag pagpang-atake sang rehimen Marcos sa pumuluyo.

Sa nagligad nga mga binulan, tuman ka damo na naman ang nabuksan nga mata sa kagarukan sang reaksyonaryong eleksyon kag peke nga demokrasya sa idalum sang nagahari nga sistema. Ginapakita sini sa pumuluyo nga matuod gid nga ang rebolusyonaryong pagbag-o ang solusyon sa mga pundamental nga problema sang pumuluyo. Tayuyon nga nagabaskog kag nagalapad ang National Democratic Front kag tanan nga katapo sini nga organisasyon, kag ginahimo ang tanan nga masarangan agud magbulig sa pagpabaskog sang Bagong Hukbong Bayan kag pagsulong sa armadong paghimakas.

Sa kaumhan, padayon nga nakapangibabaw kag nakapabaskog ang BHB sa wala puas kag brutal nga gyera sang pagpanumpo sang rehimen Marcos. Padayon nga ginapadalum kag ginapalapad sang BHB ang angot sini sa masang mangunguma agud isulong ang ila mga paghimakas nga kontra-imperyalista, konta-pasista kag kontra-pyudal, pabaskugon ang ila mga organisasyon masa, kag ilunsar ang masarangan nga mga taktikal nga opensiba. Sa giya sang Partido kag sang kahublagan panadlong, segurado nga padayon nga usoyon sang inaway banwa ang dalan sang pagsulong.