Nahilista an duha nga kaso han pagsikmit ha mga lider-masa ha Southern Tagalog ha naglabay nga duha kasemana. Labot hini, mayda liwat mga pagtalapas ha tawhanon nga katungod an mga sundalo ngan pulis ha Isabela, Quezon ngan Metro Manila.

Ha Batangas, ginsikmit han mga pwersa han estado hi Pauline Joy Banjawan, organisador han Kadamay-Southern Tagalog nga nangangampanya para ha Bayan Muna, hadton Abril 26. Duha kaadlaw kahuman han pagkawara, nasulsog hiya ha istasyon han pulis ha Santo Tomas, Batangas.

Nahibaruan nga ginsikmit hiya han 59th IB, iginpailarum ha usa kaadlaw nga tortyur antes gindara ha mga pulis. Ginkasuhan hi Banjawan han kaso nga illegal possession of firearms and explosives.

Ha Rizal, gindakop ngan iginpriso han mga sundalo han 80th IB an parag-uma nga hi Jonathan del Castello hadton gab-i han Abril 27 ha Tanay. Sigon ha biktima, iginpailarum hiya ha interogasyon ngan ginhadlok nga papatayon han mga sundalo. Gin-akusahan hiya nga an dara niya nga pagkaon han dakpon hiya idudul-ong niya ha Bagong Hukbong Bayan (BHB). Ginbuhian la hiya han 80th IB hadton kaagahon han Abril 28.

Istraping. Ha Isabela, ginpabuthan han mga elemento han 502nd IBde an lima nga nasyunal nga minoriya nga Ifugao samtang nangingisda hadton Abril 21 ha Sityo Sapiot, Barangay Tappa, San Mariano. Tulo ha mga sibilyan an ha gilayon talwas nga nakauli samtang an duha waray dayon masulsog. Nanmusil liwat an 86th IB ha Barangay Dicamay Dos, Jones hadton Abril 20.

Militarisasyon. Ha Quezon, diri mamenos ha 2,000 nga sundalo han 2nd ID an iginbuhos para ha focused military operation (FMO) ha upat nga barangay han Lopez tikang hadton Abril 21. Wala-tuo nga tsekpoynt an igintukod han militar ngan pulis nga nakadelatar ha pakabuhi, pag-uma ngan libre nga paggios han mga residente. Gin-aaruan hin sedula an ngatanan nga mga naagi ha tsekpoynt.

Pan-gigipit. Gin-ulang ha erport ngan gindid-an nga sumakob ha Pilipinas hadton Abril 26 hi Gordon Mutch, Amerikano nga membro han Baltimore Committee for Human Rights in the Philippines (BaltCHRP). Kinadi ha Pilipinas hi Mutch agud mag-obserbar ha eleksyon 2025 ngan makit-an an kamutangan han mga Pilipino ilarum han rehimen Marcos. Gindetiner hiya han Philippine Bureau of Immigration hin upat kaoras, antes hiya gindeport ha US tungod ha “kontra-gubyerno niya nga mga aktibidad.”