Kada mayda Pula nga mangaraway han Bagong Hukbong Bayan nga tikang ha sektor han kabatan-unan-estudyante nga namamatay ha aragway (o tuyo nga ginpapatay) han Armed Forces of the Philippines (AFP), waray iba nga ginyiyinawyaw an National Task Force (NTF)-Elcac kundi an panginahanglan nga puypuyon an ideya ngan panhunahuna han kabatan-unan ha mga unibersidad. Ginsesering nira nga pamaagi ini agud pugngan an pagpartisipar han mga kabatan-unan ha armado nga pakig-away o ginbabansagan hini nga “radikalisasyon” o “terrorist grooming.”

Ini nga taktika han AFP ngan NTF-Elcac nagtikang ngan nakabalayan ha doktrina nga “countering violent extremism” (CVE o “pag-ato ha madarahug nga ekstremismo”) han US. Ginkukunsidera nga “ekstremismo” o mga “hingpit nga ideolohiya” an anuman nga ideya nga iginkukunsidera nga “hulga” ha naghahadi nga sistema. Iginpapantahub an CVE ha pagpuypoy ha ngatanan nga porma han pagpahayag ngan pag-ato ha estado. Ginpapagawas hini nga an “ekstremismo” an nagduduso ha katawhan nga umato kalakip an lehitimo ngan makatadungan nga pag-armas han katawhan kontra ha reaksyunaryo nga naghahadi nga estado. Diri simple nga mga ideya ngan pagtuo an nagbubunga hini, sukwahi ha ginpapagawas han CVE, kundi an mismo nga kongkreto nga mga kundisyon han pananalumpigos, paniniyupi ngan kamadarahug han estado.

An doktrina ngan programa nga CVE

Syahan nga ginpadig-on an CVE ha ilarum han administrasyon nga Obama han US hadton 2014. Gin-gamit ini hadton panahon han kontra-Muslim nga kampanya o pagpapasamwak han Islamophobia, ngan kadungan nga gintarget an mga progresibo nga pampulitika nga aktibista. Ginpapagawas han doktrina nga an mga Muslim ngan mga aktibista “unob nga madarahug.”

Gin-gamit an CVE para ha pagpulis ngan sarbeylans ha mga lider han komunidad para i-profile o magbug-os han ladawan han mga indibidwal basar ha ira gios labina ha karukayaknon han relihiyon, tulin ngan pulitika. Katuyuanan hini nga bantayan an “radikalisasyon” han mga indibidwal nga ginsesering nga yawe agud mahingadto ha “terorismo.” Gintatawag liwat ini komo “soft counterterrorism.”

Waray pa man ginhimo an usa nga indibidwal, poyde na bansagan nga “terorista” an iya batasan ngan dalagan han panhunahuna. Talapas ini ha mga batakan nga tawhanon nga katungod sugad han katungod ha pribasiya, pagpapahayag, paggios, pag-organisa ngan iba pa. Nagtatanum ini hin kahadlok ngan nagbubunga hin “self surveillance” o “pagbantay ha kalugaringon” agud diri matahapan, ngan naghihibang ha mga komunidad.

Destroso han CVE ha Pilipinas

Hadton 2019, ginbug-os ngan ginpadig-on han gubyerno han Pilipinas pinaagi han Anti-Terrorism Council ilarum han Human Security Act an usa nga National Action Plan on Preventing and Countering Violent Extremism (NAP P/CVE). Nakasurat komo katuyuanan hini an pag-administrar ha mga programa nga nabaton ha pampulitika, pan-ekonomiya, pankultura, psychosocial ngan relihiyoso nga aspeto han “radikalisasyon” nga nahingangadto kuno ha “madarahug nga ekstremismo.”

Iginbutang ini prinsipal ha pag-administrar han Department of Interior and Local Government (DILG) kabakyang an iba pa nga ahensya han gubyerno. Gintudlok han plano an unom nga “bulnerable nga sektor” nga ginkikinahanglan sudlan agud pugngan an “radikalisasyon.” Ini nga mga sektor amo an komunidad, mga priso pulitikal ngan may kaso nga “terorismo”, lider-relihiyoso, unibersidad, nagamit hin social media, overseas Filipino workers ngan mga relihiyoso nga iskolar.

Napatuman hin yawe nga buruhaton an NTF-Elcac komo prinsipal nga ahensya nga koordineytor han mga programa nga iginpapatuman ha ilarum han plano. Nakapakete ini ha ginsesering nga “whole-of-nation approach,” an pundasyon han kabug-os han ahensya. An NTF-Elcac an nakikig-estorya ha mga klaster ngan mga panrehiyon ngan lokal nga task force agud ipatuman an NAP P/CVE.

Ha aktwal, nagkaporma an plano ha pagpatuman han Retooled Community Support Program (RCSP) hadton Oktubre 2019 pinaagi han usa nga memorandum han DILG agud sudlon an mga komunidad. Ha balayan gihapon han NAP P/CVE iginpatuman an Enhanced Comprehensive Local Integration Program (E-CLIP) hadton Marso 2020 para naman targeton an “nagbalik-loob” o mga nakapriso.

Ha mga unibersidad ngan eskoylahan, naghihimo an NTF-Elcac ngan mga ahensya ha seguridad han estado hin mga porum, mga leadership training, camping, buruhaton kooperasyon ngan iba pa nga panginlabot ha mga unibersidad agud hisgutan an “radikalisasyon.”

Usa nga nawong hini an kampanya nga Red-tagging nga napuypoy ha kalibrihan nga magpinsar, mag-organisa, magpahayag ngan iba pa nga katungod han mga kabatan-unan. Nagkamayda liwat hin mga kaso han pagkumpiska han NTF-Elcac hin mga libro ha library han mga unibersidad nga sering hini nagdudurot han “radikalisasyon.”

Pinakagrabe, ginpapayukbo han militar ngan NTF-Elcac an mga administrador han mga eskoylahan agud sumunod ha ira mando. Ha sugad hini nga balayan sinakob an AFP ha usa nga kasarabutan ha kooperasyon ha University of the Philippines. Ini liwat an prinsipal nga katuyuanan han NTF-Elcac han pasakbon an COCOPEA, grupo han mga pribado nga eskoylahan, komo kaparte han komite hini.

Hiluagan nga kahadlok ngan ugmad an ginhihimo han doktrina nga CVE ha kabatan-unan ngan katawhan. Tungod hini, damo an nag-aalang nga magpahayag han opinyon ha social media ngan magyakan para ha ira batakan nga mga katungod.