Ginsaludaran han Partido Komunista ng Pilipinas ngan Bagong Hukbong Bayan (BHB)-Negros Island (Apolinario Gatmaitan Command) an pito nga Pula nga mangaraway hini nga namatay ha “overkill” nga armado nga operasyon han Armed Forces of the Philippines (AFP) hadton Abril 27 han aga ha Barangay Tapi, Kabankalan City, Negros Occidental. Namatay an Kabankalan 7 samtang nagpapatuman ha bulawanon nga buruhaton han padayon nga pagpapasulong ha armado nga pakig-away, pagpapahiluag ha base panmasa ngan agraryo nga rebolusyon ha isla.

An pito nga namartir amo hira Reniel Locsin Cellon (Ka Randy), Mary Jane Magquilat (Ka Shonie), Charity Amacan (Ka Mayang), Johnrey Mejares (Ka Jai), Glenda Tinio Mejares (Ka Glendyl), Ka Pitong, ngan Dee Supelanas (Ka Dahlia). Hi Supelanas hadto anay lider-estudyante han UP-Cebu. Tulo ha mga martir mga senior citizen ngan mayda medikal nga kondisyon nga hinungdan han ira kakurian nga makagios.

Hadton Abril 29, nagtirok ngan duruyog nga nagtayok han kandila an mga kabatan-unan nga Cebuano ha University of the Philippines (UP)-Cebu agud saludaran hi Supelanas. Antes nagserbe komo Pula nga mangaraway, usa nga aktibista ngan lider-estudyante hi Supelanas. Ginpamunuan niya an mga kampanya para ha edukasyon, pankatilingban nga serbisyo, demokratiko nga katungod ngan pag-ato ha tiraniya ngan pasismo.

Nagpaabot han pagduyog ha kasubo an Partido ngan BHB-Negros Island ha mga pamilya, kasangkayan ngan kasama han Kabankalan 7. “Samtang nagsusubo, gamiton niyo ini nga higayon agud dugang nga pandayon an rebolusyunaryo nga diwa, komo pamaagi han pagkab-ot han hustisya ha aton mga martir,” sigon kan Ka Marco Valbuena, upisyal ha impormasyon han Partido.

Ginsukna liwat ni Valbuena an panginsulto han National Task Force-Elcac ngan AFP ha hinumduman ni Supelanas. Iginpipintar han mga pwersa han estado nga hiya “biktima han manipulasyon” han Partido ngan han BHB, ha luyo han kamatuoran nga yukut-yukot nga kabatan-unan an pumartisipar ngan mapartisipar pa ha rebolusyunaryo nga kagiusan agud bag-uhon an dunot nga katilingban tungod ha ira paghigugma ha iroy nga tuna.

Samtang, nanawagan hin imbestigasyon an grupo ha tawhanon nga katungod nga Kapatid ha pagpatay ha Kabankalan 7. Ginduduso nira an imbestigasyon tungod kay natahap hira kun “tinuod gud ba nga engkwentro nga militar an nahitabo o butaray nga pagpatay.” Iginpapahiusa han grupo nga waray man la bisan usa nga nakatalwas tikang ha pito nga Pula nga mangaraway.

Sering hini, labaw nga mas makusog ngan superyor an ihap ngan kusog pampabuto han AFP kontra ha nakabase nga mga Pula nga mangaraway, kundi kay-ano nga diri na la hira gin-aresto? “Kay-ano waray bisan usa ha ira—o hira ngatanan—an gin-aresto ngan ginsalawdan hin kaso? Agud magin mga priso pulitikal imbes nga ginpamingaw ha kadayunan?” sigon pa ha grupo.