Dara an mga bandera han National Democratic Front (NDF) ngan mga alyado nga organisasyon hini, naglansar han pakilat nga rali an gatus-gatos nga kaapi han magkalain-lain nga rebolusyunaryo nga grupo ha Divisoria ha Manila hadton Abril 29 agud igselebrar an anibersaryo han NDFP. Panawagan nira: “Armado nga rebolusyon an tinuod nga solusyon!” Ginsalin-urog han NDFP an ika-52 nga anibersaryo hini hadton Abril 24.

Nagsab-ong hin mga istrimer an Christians for National Liberation (CNL) ngan Revolutionary Council of Trade Unions (RCTU) hirani ha Malacañang nga mayda panawagan han pagpapasulong han rebolusyon.

Sigon kan Elias Dipasupil, pankabug-usan nga sekretaryo han NDFP, an NDFP komo organisasyon han nagkakaurusa nga prente, para ha rebolusyunaryo nga armado nga pakig-away. “Samtang ginkikilala an dirudilain nga porma han pakigbisog, igin-uundong han NDFP an armado nga pakig-away komo prinsipal nga porma agud mabungkag an dunot nga bagakolonyal nga bagapyudal nga sistema samtang hinay-hinay ngan dirudiretso nga ginbubug-os an bag-o nga sistema ha pagpapauswag han mga organo han pampulitika nga poder ha kabaryuhan.”

Gin-aghat niya an mga alyado nga organisasyon nga magpahiluag ngan magpakusog. “Ha presente nga pankalibutan ngan nasyunal nga krisis, kinahanglan gud an mga organisasyon masa para ha pakigbisog han katawhan Pilipino kontra ha pananalumpigos ngan paniniyupi ngan ha pagbubug-os han katilingban nga naaangay para ha ira, nga nagseserbe ha ira mga interes,” sering niya.

Nagpahayag naman hin pagbati an magkalain-lain nga organisasyon tikang ha panrehiyon tubtub nasyunal nga lebel, ngan an mga partido ha langyaw nga labnasan para ha anibersaryo han NDF. Kaupod dinhi an PKP, BHB, mga tsapter han NDF ha Southern Tagalog ngan Ilocos, NDF-Palawan, NDF-International, Liga ng Agham para sa Bayan, Makabayang Kilusan ng Bagong Kababaihan, RCTU, Kabataang Makabayan ngan KM-Southern Tagalog, Compatriots, CNL ngan Pambansang Katipunan ng mga Magbubukid.

Ginbati liwat an NDF han Friends of the Filipino People in Struggles (FFPS) ngan mga tsapter ngan organisasyon hini. Naghimo an FFPS hin mga aktibidad ngan katitirok ha magkalain-lain nga nasud hadton Abril 26 komo pagselebrar. Nagpaabot liwat hin pagbati an International Bureau han Partido Komunista ng Turkey (TKP-ML) ngan Cairde nga Filipínigh Committee han Anti-Imperialist Action Ireland.