Iginbubuksas han naghahadi nga sistema an kalugaringon hini nga kadunutan ha nahitatabo yana nga reaksyunaryo nga eleksyon. Ha naglabay nga mga bulan han pangampanya para ha eleksyon ha senado, kongreso ngan mga lokal nga gubyerno, nakit-an han katawhan kun tiunan-o an eleksyon ha Pilipinas kontrolado han mga dinastiya ngan partido nga nagtataglawas ha interes han mga langyaw nga imperyalista ngan pipira ngan diri han mayoriya han katawhan.

An eleksyon 2025 ginhahadian han pinakadunot nga mga paksyon han naghahadi nga klase: han mga Marcos ngan Duterte, ngaduha lanong ha korapsyon, panmuypoy ngan pananalumpigos ha nasud, ngan ha pagin niyutiyo ha mga dikta han langyaw nga imperyalista. Ngaduha hira yana nagdudusu-dusoay agud makatinan an poder ha katuyuanan nga pahiluagon an ira karikuhan ngan burukratiko nga pribilehiyo, ngan makalibre ha mga baratunon ha mga krimen nira ha katawhan.

Karuyag han barkadahan nga Marcos nga paghadian an kongreso, senado ngan mga LGU agud dugang nga mapahugot an kontrol ha poder ngan himuon an kundisyon para ha pagpahilawig ha poder han ira dinastiya lahos ha 2028. Gintagan lugway ni Marcos an pagpapriso kan Duterte ha International Criminal Court kun diin akusado hiya ha mga krimen kontra ha katawhan ha pag-atentar nga idiskaril an mga karibal niya ha pulitika. Wala-tuo an palabas ngan gimik han rehimen Marcos agud makuha an hiluag nga suporta han katawhan. Kundi, pakyas ini nga tahuban an grabe nga krisis han kakurian dara han waray tubtuban nga paghitaas han presyo han mga papliton, himubo nga suhol ngan kawaray han trabaho.

Naglalanat an mga Duterte nga maisulod an sadang nga ihap han ira mga tawuhan ha Senado, prinsipal para pugngan an impeachment kan Vice President Sara Duterte, nga akusado ha maanomaliya nga paggastos ha gatus-gatos kamilyon pisos nga badyet han gubyerno. Agud kuhaon an simpatiya han katawhan, ginpagawas nira nga hira mga biktima han pampulitika nga pananalumpigos ni Marcos. Kundi, pakyas hira nga paraon an lab-as nga hinumduman han masa han hiluagan nga kamadarahug ngan pag-antos ha ilarum han naglabay nga rehimen, ngan tahuban an guliat han katawhan para ha hustisya ha ngatanan nga biktima han pasista nga krimen han tirano nga hi Duterte.

Iginpakita han dominasyon han duha nga dunot nga paksyon ha eleksyon 2025 an makangaralas nga eleksyon ha ilarum han bagakolonyal ngan bagapyudal nga sistema ha Pilipinas. Paisan-isanay ini han pipira nga poderoso. Waray tinuod nga espasyo an pagpartisipar han masa nga tiniyupi ngan tinalumpigos. Ginpapagawas nga demokratiko an eleksyon, bisan kun an kamatuoran, para la ini ha mga burukrata kapitalista, mga burgesya komprador ngan agaron maytuna.

Ha naglabay nga mga bulan, naghimo hin makusog nga aringasa an pagpartisipar han mga demokratiko, progresibo ngan patriyotiko nga kandidato ngan partido ha eleksyon ha senado ngan kongreso. Gindara nira ha kampanya nga eleksyon an mga panawagan para ha makaburuhi nga suhol ngan sweldo, tinuod nga reporma ha tuna, pagpahimubo han presyo han mga papliton, libre nga serbisyo pankalibsugan ngan edukasyon, trabaho, katungod, katalwasan ngan iba pa nga hingyap han katawhan. Nagtikang an kadam-an ha ira ha ranggo han mga parag-uma ngan trabahador, mga kablas-ha-syudad, parupangisda, drayber ngan iba pa nga tiniyupi nga sektor.

Sukwahi dinhi an mga reaksyunaryo nga pulitiko nga nagpakabungol-bungol ha mga guliat han katawhan. Kun napostura man nga maka-masa, tubtub eleksyon la iton. Gamit an ira hilarum nga atabay han karikuhan, gindodominaran liwat nira yana an eleksyon nga party-list ngan gintatanggalan han espasyo an mga partido nga tinuod nga nagtataglawas ha kablas nga sektor han katilingban.

Gatus-gatos kamilyon pisos an gastos nira para ha mga patalastas ha radyo ngan telebisyon, agud luobon an mga pader ngan poste han ira mga poster ngan manhatag hin mga bado nga may tatak han ira nawong ngan ngaran. Kadungan hini, baga mga ulaping nga nagkagawas an mga sarbey agud impluwensyahan an hunahuna han katawhan. Kalakip hini an paggamit han mga binaydan nga tagapag-impluwensiya ha social media agud iduso an diskusyon pabor ha interes han mga pulitiko ngan partido. Gatus-gatos kamilyon pisos an segurado nga mabaha pa samtang tikahirani an mismo nga adlaw han eleksyon agud ipamalit han botos.

Wala-tuo an mga kaso han panmatay ngan kamadarahug han mga nagriribalay nga pulitiko ha magkalain-lain nga parte han nasud. Kamadarahug naman han estado an gin-gagamit han mga ahente han militar, pulis ngan NTF-Elcac agud gipiton an mga progresibo nga kandidato ngan partido, ha porma han sarbeylans, pagsalawad hin hinimu-himo nga kaso, pangaresto ngan panmriso, ngan panarhug ha ira mga pwersa ngan tagasuporta.

Segurado nga utro nga gagamiton han nakalingkod ha poder an dekompyuter nga pag-ihap ha mga botos agud pumabor ha ira an magigin resulta han eleksyon. Sanglit nagtitikakusog an panawagan para ha manu-mano nga pag-ihap han botos nga maghahatag hin dako nga kaseguruhan nga eksakto nga naiihap an mga botos. Sugadpaman, padayon ini nga ginbabalewaray han Comelec. Gintatantiya nga dako nga ihap han mga migrante nga Pilipino nga trabahador an diri makakabotos tungod ha ginhimo nga online voting.

Hin-o man ha mga Marcos o mga Duterte an magdaug ha tiarabot nga eleksyon, segurado nga padayon ngan dugang nga mapaspas an kadunot han reaksyunaryo nga estado, atubangan han waray kasolbaran nga krisis han naghahadi nga sistema. Padayon ini nga magpapatuman han mga programa ngan balaud nga pabor ha interes han imperyalismo nga US, han dagko nga langyaw nga kompaniya ngan mga naghahadi nga klase, nga magdadara han dugang nga pag-antos ha katawhan. Segurado nga matikagrabe pa an korapsyon ha pagbawi han mga burukrata kapitalista han gatus-gatos kamilyon nga iginpuhunan nira ha eleksyon.

Kinahanglan padayon nga padig-unon an solido nga organisado nga ranggo han katawhan Pilipino ngan magpursige ha dalan han militante nga pakigbisog, labina ha pag-atubang ha dagko nga away ha tiarabot nga mga bulan ngan tuig, kalakip na an pag-abre han pagbista han Senado kasumpay ha impeachment ni Sara Duterte ngan pagbista kan Rodrigo Duterte ha ICC, sugadman ha natikapintas nga panginlabot militar han US ha Pilipinas ngan panulsol han gerra kontra ha China, ha pagpapaka-niyutiyo ni Marcos, ha kontra-katawhan ngan pakuri nga palisiya, korapsyon, kawaray-pulos ngan pasista nga panmuypoy ngan pangatake han rehimen Marcos ha katawhan.

Ha naglabay nga mga bulan, damo kaupay na liwat an napukaw ha kadunutan han reaksyunaryo nga eleksyon ngan buwa nga demokrasya ha ilarum han naghahadi nga sistema. Iginpapakita hini ha katawhan nga tinuod gud nga rebolusyunaryo nga pagbabag-o an solusyonn ha mga pundamental nga problema han katawhan. Dirudiretso nga natikakusog ngan natikahiluag an National Democratic Front ngan ngatanan nga membro hini nga organisasyon, ngan ginhihimo an ngatanan han makakaya agud bumulig ha pagpapakusog han Bagong Hukbong Bayan ngan pagpasulong ha armado nga pakig-away.

Ha kabaryuhan, padayon nga nakakagpursige ngan nakakapakusog an BHB ha luyo han waray hunong ngan brutal nga mapanmuypoy nga gerra han rehimen Marcos. Padayon nga ginpapahilarum ngan ginpapahiluag han BHB an sumpayan hini ha masa nga parag-uma agud ipasulong an ira mga kontra-imperyalista, kontra-pasista ngan kontra-pyudal nga pakigbisog, pakusgon an ira mga panmasa nga asosasyon, ngan ilansar an maaakos nga mga taktikal nga opensiba. Ha giya han Partido ngan han kagiusan nga pagtutul-id, segurado nga padayon nga hahasugon han gerra han katawhan an dalan han pag-abante.