Matatad-an an pinakadako nga ihap han mga trabahador nga Pilipino ha Southern Tagalog. Ha kabug-usan, 18% han bug-os nga pwersa han pagtrabaho han nasud aada ha rehiyon. Naikaduha dinhi an National Capital Region kun diin naihap ha 10.4 kamilyon an mga trabahador. Nakakonsentra ha Calabarzon an 12.1 kamilyon ha 14.2 kamilyon nga pwersa han pagtrabaho ha rehiyon.

Diri pa kaapi dinhi an diri iginkokonsidera han estado nga pwersa han pagtrabaho sugad han mga housewife, retirado, out-of-school nga kabatan-unan, naggradweyt kundi waray masudlan nga trabaho, mayda kapansanan, ngan mga waray mamiling hin trabaho ha sakob han unom kabulan. Ha pinakaurhi nga igin-gawas nga sarbey han reaksyunaryo nga estado, an “labor force participation rate” o porsyento han populasyon nga edad 15 tipaigbaw nga kaparte han pwersa han pagtrabaho, 64.8% la ha Calabarzon ngan 64.2% ha Mimaropa.

Ha mga mayda trabaho, ikatulo kaparte an ginkategoriya nga self-employed o nag-eempleyo ha kalugaringon. Labot hini, mayda 7% nga igin-api ha employed kundi waray suhol o diri ginababaydan an pagtrabaho. Kun gintig-ob an duha nga kategoriya, 35% ini han pwersa nga pagtrabaho nga may ihap nga 3.2 kamilyon ha bug-os nga rehiyon. Kun igindugang ini ha upisyal nga ihap han waray trabaho, mayda makalilinop nga ihap nga 3.7 kamilyon nga waray pormal nga trabaho ha ranggo han 9.2 kamilyon nga pwersa han pagtrabaho ha Southern Tagalog. Dugang ha ira an aada ha 1.4 kamilyon nga trabahador nga underemployed o kulang ha trabaho.

Himubo nga suhol

An suhulay ngan nagsusuweldo nga trabahador ha rehiyon nakomponer ha 64% han pwersa nga pagtrabaho nga may trabaho. Aada ha pribado nga kompaniya an 4.4 kamilyon, samtang empleyado han gubyerno an 777,000.

Himubo kaupay ngan diri makaburuhi han pamilya an suhol nga iginbabayad han kapitalista ngan burukrata kapitalista ha mga trabahador, ha pribado man o pampubliko nga sektor. Ha Calabarzon, ₱522 la kada adlaw an minimum nga suhol hadton Mayo 2024 samtang ₱1,122 an igintalaan nga makaburuhi nga suhol para ha 5-katawo nga pamilya kada adlaw. Ha Mimaropa, kamakaluluoy nga ₱352 kada adlaw an minimum nga suhol hadton Marso 2024, hirayo ha igintalaan nga makaburuhi nga suhol para ha 5-katawo nga pamilya nga ₱1,213. Baga hin palisiya han reaksyunaryo nga gubyerno an diri makatawo nga kita han trabahador.

Milyun-milyon an mga trabahador kundi guti nga ihap la an organisado ha mga unyon nga prinsipal nga organisasyon nga magpapasulong han ira katungod ha makatadungan nga suhol. Ha rekord hadton 2021-2022, ha bug-os nga ihap nga 34,543 nga kompaniya ha nasud nga may pinakahimubo nga 20 nga trabahador tipaigbaw, 1,464 nga kompaniya o 4.2% la an may rehistrado nga unyon. Mas guti ini ha nahiuna nga 6.3% hadton 2018.

Terorismo an baton han rehimen ha pag-ato han klase nga trabahador

An hadto pasista nga panmuypoy ha pag-unyon han mga trabahador ginlahusan pa han butaray nga terorismo han estado pinaagi han pagsabalaud han Anti-Terrorism Law. An reaksyunaryo nga estado an naghihimo han terorismo kontra ha ordinaryo nga katawhan labina kontra ha mga trabahador, aktibista, mga tawo nga mayda makatadungan nga adbokasiya ngan mga kritiko han gubyerno. Hiluagan nga gin-gagamit han mga militar, pulis ngan ahensya han estado sugad han NTF-Elcac an Red-tagging nga nagpupuntirya ha lider ngan aktibista nga kaapi han unyon. Pangandam ini para himuon an pagpatay, pagsikmit ngan pagpawara ha ira. Landaw nga pananglitan hini an operasyon han PNP-Calabarzon nga gintawag nga Bloody Sunday hadton Marso 7, 2021 nga nagpatay ha siyam nga lider ngan organisador kaupod an lider-trabahador nga hi Manny Asuncion. Kataliwan han pira kasemana ginpatay liwat hi Dandy Miguel nga presidente han unyon ha Fuji Electronics ha Laguna.

Hadton temprano nga parte han 2023, usa nga delegasyon han International Labour Organization (ILO) an naghimo han imbestigasyon ha kamutangan han mga unyon ngan nagpahayag han pagkundena ha dalagan han panhunahuna han reaksyunaryo nga gubyerno nga pirme iginsusumpay an unyonismo ha komunismo. Tikang 2016, 76 nga unyonista ngan organisador an nahirekord nga ginpatay han mga panseguridad nga pwersa han estado. Bisan kahuman han misyon han ILO ha nasud, upat pa nga unyonista an nahireport nga ginpatay.

Tikang ha Kalatas, Mayo 2025.