Masobra 7,000 nga trabahador, kaupod an kabatan-unan ngan iba pa nga demokratiko nga sektor, an nagmartsa ngadto ha Mendiola ha Manila hadton Mayo 1, Adlaw han Pagtrabaho. Nanawagan hira nga pahitas-on an suhol ha makaburuhi nga lebel ha bug-os nga nasud. Nagkamayda hin kapareho nga mga paggios an mga trabahador ha mga syudad han Baguio, Angeles, Calamba, Naga, Cebu, Iloilo, Roxas, Bacolod, ngan Davao, ngan ha bungto han Rosario ha Cavite.

Sigon ha mga trabahador, kaangayan nga pahitas-on an minimum nga suhol ha makaburuhi nga lebel nga ₱1,200 tungod ha natikahitaas nga balor han panginabuhi ngan pira kadekada na nga pagpugong ha paghitaas han suhol. Ha yana, aada ha 36% tubtub 54% an nakakarawat nga suhol han mga trabahador tanding ha ira panginahanglan. Igin-insister nira nga bungkagon an mga regional wage board nga naghahatag hin serusensilyo nga paghitaas. Panawagan liwat nira an pagpaundang ha kontraktwalisasyon ngan pagdepensa ha katungod ha unyon, kalakip an katungod ha pag-organisa ngan collective bargaining.

₱200 across-the-board

Kadungan han panawagan nga makaburuhi nga suhol, iginduso han National Wage Coalition (NWC) an pagsabalaud ha ₱200 nga dugang nga suhol agud ha gilayon matagan han lugway an mga trabahador. Iginpapasulong han koalisyon an proposisyon atubangan han pira katuig nga pagkadelatar ha mga proposisyon nga dugang nga suhol ha Kongreso ngan Senado. Kun mahiduso, ini an syahan nga nasyunal nga dugang nga suhol nga ig-aagi ha balaud ha nakalabay nga 36 katuig. Ginkokomponer an NWC han 30 nga mga sentro han pagtrabaho, kalakip na an KMU.

Sugad han ginlalauman, gin-utro la ni Ferdinand Marcos an baton nga “aadman” an proposisyon nga umento. Kabaliskaran ini ha kadagmiton han pagpasar han rehimen han ehekutibo nga kamanduan nga nagdugang han ₱200 ha inadlaw nga alawans ha mga sundalo ngan pulis yana nga tuig.

Diskriminasyon ha suhol ha kabaryuhan

Makaburuhi nga suhol liwat an panawagan han mga trabahador ha agrikultura ha Adlaw han Pagtrabaho. Sigon ha Unyon ng mga Manggagawa sa Agrikultura, kun himubo na an suhol ha kasyudaran, mas himubo pa an suhol han mga trabahador ha uma ha luyo han mahinungdanon nga papel nira ha produksyon han pagkaon.

Baga hin mga “third class citizen” o himubo nga klase han mulopyo an mga trabahador ha kabaryuhan, sigon ha UMA. Ha Eastern Visayas, pananglitan, aada la ha ₱390 an suhol ha mga trabahador ha agrikultura, nga 32.5% la han makaburuhi nga suhol. Ha Negros, kun diin matatad-an an dagko nga asyenda, yukut-yukot nga mga trabahador ha uma an higot ha sistema nga pakyaw nga mas himubo pa ha igintalaan nga minimum nga suhol an ginkakarawat para ha mga trabahador ha agrikultura.

Dugang ha barato nga suhol, naatubang liwat hira ha diri-makatawo ngan delikado nga mga kundisyon ha trabaho. Agsub hira mabutad ha mga delikado nga mga kemikal, grabe nga paso han adlaw ngan iba pa nga sitwasyon nga nakakaraut ha kalibsugan.

Ayat ha mga trabahador nga Pilipino

Ha pahayag han Partido Komunista ng Pilipinas ha Adlaw han Pagtrabaho, gin-aghat hini an mga trabahador nga Pilipino nga magkaurusa ngan gumios agud magserbe nga madig-on nga butagtok, hiluag nga pwersa ngan pinuno ha pakigbisog han katawhan Pilipino para ha nasyunal ngan pankatilingban nga katalwasan.

Kinahanglan nira ipasulong an militante nga mga pakigbisog han unyon agud ipakig-away an makaburuhi nga suhol, ngan depensahan an mga demokratiko nga interes ngan kaupayan han mga trabahador, sering hini. Kinahanglan nira pankatinan ngan gamiton an welga komo armas ha ira mga pan-ekonomiya ngan pampulitika nga pakigbisog.

Sering han Partido, kinahanglan igpusisyon han mga trabahador nga Pilipino an ira ranggo ha unhan han mga pakigbisog han katawhan, kalakip an pag-ato ha korapsyon han naghahadi nga rehimen, mga pasista nga krimen, waray hunong nga paghitaas han presyo han mga papliton ngan waray wantas nga importasyon han bugas. Kinahanglan nira paaningalon an panawagan para ha tinuod nga reporma ha tuna ngan nasyunal nga industriyalisasyon ngan nasyunal nga demokrasya.

Kinahanglan liwat atuhan an Balikatan ngan mga war games nga panulsol han gerra han US ngan an pagpakaniyutiyo han rehimen Marcos ha iya imperyalista nga amo. Nanawagan liwat ini ha mga trabahador nga Pilipino nga ipakita an pakig-usa ha katawhan Palestino kontra ha henosidyo han Zionista nga estado han Israel.