Pannakasebseb iti gakat a nayon-sueldo, tinubngar. Nagprotesta idi Hunyo 12 idiay Quezon City ti Kilusang Mayo Uno ken dagiti grupo ti mangmangged tapno kondenaren ti pananglapped ti rehimen US-Marcos ken dagiti paspasurot na iti nasao a gakat tapno manayunan iti inaldaw a sueldo dagiti mangmangged iti P200. Rason ti Senado nga “awanen ti panawen” ken “awanen ti umdas a panagadal” tapno pagsasaritaan ti gakat iti tukad bicameral conference ti maika-19 Kongreso.

Panagikkat ti Sun Ace Polymer, kinondenar. Nagpiket dagiti mangmangged iti Sun Ace Polymer Manufacturing Corporation iti sango ti Department of Labor and Employment-National Capital Region idi Hunyo 10 tapno kiddawen da ti dagus a panagsubli iti trabaho dagiti naikkat a mangmangged. Iligal nga inikkat ti kompania ti 31 a mangmangged kalpasan a nagreklamo da iti labor-only contracting ken kadagiti i pannakaabuso iti trabaho. Ti Sun Ace ket adda idiay Valenzuela City ken agparpartuat ti plastic sando bag.

Kompensasyon, ilablaban sadiay Batangas. Nasurok a 1,000 mannalon, mangngalap, mangmangged-talon ken agpampanday manipud iti umuna a distrito ti Batangas ti timmabuno iti panagsasarita iti Department of Agriculture-Calabarzon idiay Balayan, Batangas idi Hunyo 18. Dawaten da ti madagdagus a pannakaiwaras ti kompensasyon para iti epekto ti didigra ken ti pannakaibunong ti disaster fund para iti pudpudno a rehabilitasyon ti pangkabiagan da.

Panangagum iti daga idiay Zambales, linabanan. Nagbarikada dagiti residente ken mannalon iti Barangay Taltal, Masinloc, Zambales idi Hunyo 19 tapno malapdan ti naikeddeng a demolisyon iti komunidad da. Lima a residente ti inaresto dagiti pulis gapu iti panagprotesta da. Ti pamilya a Yap ti manggamgamrud iti 32 ektarya a daga a suksukayen dagiti mannalon iti dayta a lugar gapu ta naikkaten iti Comprehensive Agrarian Reform Program. Sakbay ti barikada, napan dagiti mannalon idi Hunyo 10 iti Department of Agrarian Reform-Zambales iti ili ti Iba tapno kiddawen da a maluktan manen ti imbestigasyon ti ahensya mainaig iti karbengan da iti daga.

Balud pulitikal iti Quezon, wayawayaan! Dagiti grupo ti karbengan-tao ket nagprotesta idiay Quezon idi Hunyo 16 tapno agkiddaw iti pannakawayawaya dagiti balud a pulitikal iti probinsya. Naangay ti piket iti ili ti Pagbilao, ken iti Lucena City nu sadinno a dinengngeg iti kaso da Lino Baez ken Willy Capareño iti dayta nga aldaw.