Rinibribu nga umili ti nagprotesta iti sango ti Senado iti Pasay City idi Hunyo 11 tapno iduron ti pannakausig ni Vice President Sara Duterte iti kaso na nga impeachment. Naupay dagiti umili iti kasla panangsalaknib ti Senado, nga tumaktakem kas impeachment court, ken ni Duterte kadagiti taktika na a mangitantan iti pannakabista.

Sinalungasing ti Bagong Alyansang Makabayan (Bayan) ken ti dadduma pay a grupo dagiti maniobra dagiti maka-Duterte a senador ken uray ni Senate President Francis Escudero. Immuna a naituding ti petsa ti pormal a pannakailukat ti impeachment court iti Hunyo 2, kalpasan ti uppat a bulan a pannakaitantan, ngem naiyalis dayta iti Hunyo 11, ti maudi nga aldaw ti sesyon ti senado.

Gapu iti duron ti sumagmamano a senador, napilitan ni Escudero a buklen ti impeachment a korte idi Hunyo 10. Iti dayta nga aldaw, induron ni Sen. Bato dela Rosa nga maibasura ti kaso nga impeachment. Saan nga immanamong dagiti senador ngem ti kaaduan (18 senador) ti nangibutos a pabor iti pannakaisubli (remand) ti reklamo iti House of Representatives.

Naipatulod daytoy iti nababa a kamara tapno makompirma kano no maitunos iti konstitusyon ti proseso ti impeachment dagiti kongresista kontra ken ni Duterte . Binabalaw dagiti grupo iti daytoy nga addang ken kinuna ti adu nga abogado ken eksperto iti linteg a daytoy ket labsing iti konstitusyon.

Idi Hunyo 11, naaddaan met dagiti protesta idiay Iloilo City ken Bacolod City. Nangisayangkat dagiti myembro ti organisasyon ti Bayan ti demonstrasyon idi Hunyo 12 idiay Cebu City ken Hunyo 13 idiay Baguio City ken La Union kontra kadagitoy a panangmaniobra.

Nagtignay met ti dadduma a grupo ken alyansa a laban iti pannakaitantan ti pannakabista ni Sara Duterte.