Pagpatay sa hagna nga dugang nga sweldo, ginbatikos. Nagprotesta sadtong Hunyo 12 sa Quezon City ang Kilusang Mayo Uno kag mga grupo sa pamugon agud kondenahon ang pagpatay sang rehimen US-Marcos kag mga alipures sini sa hagna nga layi para sa dugang nga ₱200 sa inadlaw nga sweldo sang mga mamumugon. Ginrason sang Senado nga “wala na sang panahon” kag “wala sang bastante nga pagtuon” agud talakayon ang hagna sa lebel sang bicameral conference sang ika-19 nga Kongreso.

Kakasanay sa Sun Ace Polymer, ginkondenar. Nagpiket ang mga mamumugon sang Sun Ace Polymer Manufacturing Corporation sa atubang sang Department of Labor and Employment-National Capital Region sadtong Hunyo 10 para igiit ang gilayon nga pagpabalik sa trabaho sang ginkakas nga mga mamumugon sini. Iligal nga ginkakas sang kumpaniya ang 31 ka mamumugon pagkatapos nila nga ireklamo ang labor-only contracting kag mga pagpang-abuso sa trabaho. Ang Sun Ace yara sa Valenzuela City kag nagahimo sang plastic sando bag.

Kumpensasyon, ginpakigbato sa Batangas. Masobra 1,000 ka mangunguma, mangingisda, mamumugon sa uma kag tapasero halin sa una nga distrito sang Batangas ang nagtambong sa ginpatigayon nga dayalogo sa Department of Agriculture-Calabarzon sa Balayan, Batangas sadtong Hunyo 18. Panawagan nila ang gilayon nga pagpanagtag sang kumpensasyon para sa epekto sang kalamidad kag ang alokasyon sang disaster fund para sa matuod nga rehabilitasyon sang ila palangabuhian.

Pagpang-agaw sang kadutaan sa Zambales, ginpakigbatuan. Nagbarikada ang mga residente kag mangunguma sang Barangay Taltal, Masinloc, Zambales sadtong Hunyo 19 agud punggan ang natalana nga demolisyon sang ila komunidad. Lima ka residente ang gin-aresto sang mga pulis tungod sa ila pagpamatuk. Gina-agaw sang pamilya Yap ang 32 -ektarya nga duta nga ginabungkal sang mga mangunguma sa lugar tungod ginkakas ini sa sakop sang Comprehensive Agrarian Reform Program. Antes ang barikada, nagkadto ang mga mangunguma sadtong Hunyo 10 sa Department of Agrarian Reform-Zambales sa banwa sang Iba agud ipanawagan ang liwat nga pagbukas sang imbestigasyon sang ahensya kaangot sa ila kinamatarung sa duta.

Bilanggong pulitikal sa Quezon, hilwayon! Nagpiket ang mga grupo sa tawhanon nga kinamatarung sa Quezon sadtong Hunyo 16 agud ipanawagan ang paghilway sa mga bilanggong pulitikal sa probinsya. Ginpatigayon ang piket sa banwa sang Pagbilao, kag Lucena City kon diin ginabista sa adlaw nga ini ang kaso nga ginaatubang nanday Lino Baez kag Willy Capareño.