Karaman dagiti amin a puersa ken umili iti intero a lubong a mangitandudo iti kappia, mangraem iti panagwaywayas dagiti pagilian ken iti internasyunal a linteg, masapul a tumakder ti umili a Pilipino laban iti saan a naprobokar a terorista a panangraut ti Zionista nga estado iti Israel, kakomplut ti imperyalismo nga US, laban iti pagilian nga Iran ken kadagiti umili na. Ti nasurok a makalawas nga awan sarday daytoy nga iraraut, aramat kadagiti jetfighter, misayl ken drone, ket nalawag a pananglabsing iti soberanya ti Iran ken mangrubrob iti dakdakkel a gubat.

Babaen kadagiti armas nga it-ited ti US, puntiryaen ti Israel dagiti pasilidad ti nuclear energy, dagiti refinery ti lana, dagiti industriyal a lugar, dagiti pasilidad iti research, ken uray dagiti sibilyan a pasdek.Tartargeten daytoy dagiti dadaulo nga opisyal militar ken kangrunaan a siyentista ti Iran. Iti las-ud ti makalawas, saan a bumaba iti 630 ti pinapatay ti Israel kadagiti panagraut, a pakairamanan ti agarup 270 a sibilyan.

Di nakapapati ti panangikalintegan ti Zionista nga Israel iti panangbomba na iti Iran, a panggep na kampay a lapdan daytoy a maaddaan kadagiti nukleyar nga armas. Ti kasta a panangikalintegan ti Israel, nga ay-ayunan ni President Trump ti US, ket nairut nga ilaklaksid ti International Atomic Energy Agency ti United Nations a nangibaga nga awan ti pammaneknek nga adda programa ti Iran a mangpataud kadagiti nukleyar nga armas, kalpasan a sinukimat na dagiti pasilidad nukleyar.

Ti Israel ti kadakkelan a pangta nukleyar iti Middle East, agsipud ta addaan daytoy iti agarup 100 armas nukleyar (nuclear warheads) ken kabaelan na ti agaramid iti 300 pay. Awan ti karbengan na a manglapped iti Iran, maysa nga nawaya a pagilian, a mangpatanor iti bukod na a kabaelan a nukleyar , iti enerhiya man wenno militar. Babaen ti panangraut ti Israel iti Iran, dinadael na ti panagregget ti Iran a mangpabaro iti Joint Comprehensive Plan of Action, ti tulag a manglapped iti panagwaras dagiti nukleyar nga armas, nga inbasura ti US idi 2018.

Ti estratehiko a panggep ti panangraut ti Israel iti Iran ket tapno iwayat ti hegemonya ti imperyalismo nga US iti Middle East ken tapno makontrol na ti nakalawlawa a reserba ti lana iti rehiyon. Panggep na a dusaen ti Iran gapu iti panangikagumaan na a mangsaluad iti soberanya na ken kigtuten ti dadduma a pagilian iti rehiyon tapno agparintumeng da iti bileg ti US ken Israel.

Nakaam-ames dagiti iraraut ti Israel iti Iran, nangnangruna ta kagiddan na ti dandani dua a tawenen a panangbomba na ken panangsakop na iti Gaza Strip, ti daga dagiti Palestino. Agarup 60,000 Palestino ti napapatay iti henosidyo ti Zionista nga estado ti Israel. Kalpasan a naan-anay a dinadael na ti Gaza, mangpatpataud ita ti Israel iti nakaro a krisis ti bisin ken sakit babaen ti panangiparit na a makaserrek amin nga makatao nga ayuda, panangkontrol na iti pannakaiwaras ti makan, ken dandani inaldaw a di agressat a panangpalto paltog kadagiti nakapila nga agur-uray iti ayuda.

Babaen iti suporta ti US iti pannakadadael ti Gaza, timmured ti Zionista nga estado ti Israel, a palawaen ti gerra nga agresyon iti intero nga rehiyon iti Middle East. Kadagiti kallabes a bulan, rinaut na ti Lebanon ken Syria. Tinengngel dagiti managsakop nga pwersa iti Israel ti Golan Heights ken dadduma pay nga estratehiko a paset iti Syria, kalpasan a makitinnulong ti US kadagiti armado a grupo sadiay tapno maparmek iti gobyerno ni Bashir al-Assad. Kadua na ti US, agtultuloy met iti panangbomba na idiay Yemen.

Masapul a suportaran dagiti demokratiko a pwersa iti lubong ti Iran iti panangsalaknib na iti bukod da laban iti agresyon ken panangraut ti US-Israel. Minilyon nga Iranian ti nagu ummong idiay Tehran ken dadduma pay a syudad ti Iran tapno ipakita da ti panagkaykaysada ken ti kinatured da a mangsaranget iti iraraut ti Israel. Naan-anay ti kalintegan ti Iran a bumales iti Israel ken mangidepensa iti soberanya na. Kadagiti kallabes nga aldaw, nagpatayab daytoy kadagiti bukod na a misayl. Adu kadagitoy, a pakairamanan dagiti hypersonic missile, ket napaay a nadepensaran ti Israel. Iti sango ti kumarkaro a pannakadangran ti Israel, dagiti umili ti Israel ket in-inut a maririing nga agsao ken tumakder laban iti terorismo ti Zionista nga estado.

Ad-adda itan ti pannaka isina ti Israel ken US iti internasyonal a komunidad dagiti pagilian. Manipud Europa agingga iti Asya, nagkaykaysa iti kiddaw iti Israel nga isardeng iti panangraut da iti Iran. Iti sanguanan ti nasaknap nga internasyonal ken lokal a panangsuppiat, agalla-alla ni Trump iti pagtutungtungan a gandat na a direkta a makigubat ken mangitinnag iti 30,000-pound a bomba iti Iran.

Nasken a palawaen ken papigsaen ti kiddaw dagiti demokratiko a puersa iti sangalubungan tapno gibusan ti panangbomba ti US ken Israel iti Iran. Kagiddan daytoy, masapul a mapasingkedan ti pukkaw a suportaran iti umili ti Palestino, ken ti panangpatakyas kadagiti puersa ti Zionista nga estado ti Israel manipud iti Gaza, tapno maisubli dagiti Palestino ti pagtaengan ken biag da. Nasken a papigsaan ti kiddaw kadagiti umili ti Israel a tumakder maibusor iti pasista a rehimen ni Netanyahu ken irupir iti dagus a pananggibus kadagiti gerra nga agresyon na.

Ti gerra nga agresyon laban iti Iran ket maysa a pagilasinan ti kumarkaro a krisis ti imperyalismo, ken maysa a kangrunaan a duron ti imperyalista nga US iti sidong ni Trump a bingayen manen dagiti gameng ti lubong, a pabor kadagiti bukod na a pagimbagan. Manipud Europa, ti Middle East ken Asya, ti US ket ad-adda nga agbalbalin nga agresibo iti panangibuntuon kadagiti dadakkel a rekurso pangmilitar, ken panagirussuat kadagit proxy a gerra laban kadagiti pagilian a manglaplapped iti panangiwayat na iti hegemonya iti intero a lubong.

Masapul nga agkaykaysa dagiti umili a Pilipino a mangsuporta kadagiti umili ti Iran a manglaban iti imperyalista a gubat. Kagiddan daytoy, masapul nga agtignay dagiti umili a Pilipino laban iti panangaramat ti imperyalismo nga US iti pagilian a kas lugar a paggugubatan. Masapul nga agtignay dagiti mangmangged ken mannalon, ken mangbuangay da iti nalawa a nagkaykaysa a prente tapno labanan da ti panangriribuk ken panagsagana ti US iti gubat.

Nasken nga itultuloy a papigsaen ti New People’s Army ken ti armado a pannakidangadang iti intero a pagilian. Ti gubat ti umili ken rebolusyonaryo a tignayan ti kapigsaan nga armas dagiti umili a Pilipino a manglaban iti papet a rehimen Marcos, lappedan iti panggep na a iparangguyod iti pagilian iti gubat nga parparubruban iti imperyalista nga among na, ken mangilaban iti pudno a wayawaya ti pagilian.