Minilyon nga umili iti Estados Unidos ti nagprotesta idi Hunio 14 kas aldaw nga “Awan Ari” kas panangsupiat kadagiti antipasista ken kontra-umili nga annuroten ti gobyerno ni Trump. Agarup 2,000 a protesta iti 1,500 a syudad ti nairussuat iti intero a pagilian.

Naawagan ti protesta nga”Awan Ari”, laban daytoy iti panagturay ni Trump a kasla maysa nga ari ken panagtagikua ti bileg a nalablabes pay ngem ti kina presidente.

Panawagan pay daytoy tapno patakyasen isuna iti “trono.”

Idiay Los Angeles, daytoy a protesta ket kasaruno iti nasurok makalawas a protesta kontra iti panangkamat kadagiti imigrante ken panangideploy ti National Guard ken Marines iti syudad. Karaman kadagiti nagprotesta ket dagiti Migrante LA, Anakbayan LA, Gabriela LA ken National Alliance for Filipino Concerns. Agarup 330 imigrante iti syudad iti inbalud ti ICE manipud Hunyo 6.

Kagiddan ti pannakilaok iti protesta dagiti nailian demokratiko nga organisasyon nga “Awan Ari”, dagiti kameng ti Anakbayan Philadelphia ket nangisab-it ti istrimer nga nakaisuratan ti pukkaw a “US pumanaw iti Pilipinas itan” iti Vine Street, Expressway Philadelphia.