Pagpatay ha proposisyon nga dugang nga suhol, ginsukna. Nagprotesta hadton Hunyo 12 ha Quezon City an Kilusang Mayo Uno ngan mga grupo ha pagtrabaho agud kundenaron an pagpatay han rehimen US-Marcos ngan mga alipures hini ha ginpoproponer nga balaud agud dugngan hin ₱200 an inadlaw nga suhol han mga trabahador. Iginrason han Senado nga “waray na panahon” ngan “waray sadang nga pag-aram” agud talakayon an proposisyon ha balitang han bicameral conference han ika-19 nga Kongreso.

Taranggalay ha Sun Ace Polymer, ginkundenar. Nagpiket an mga trabahador han Sun Ace Polymer Manufacturing Corporation ha atubangan han Department of Labor and Employment-National Capital Region hadton Hunyo 10 agud igdemanda an dagmit nga pagpabalik ha trabaho han gintanggal nga mga trabahador hini. Iligal nga gintanggal han kompaniya an 31 nga trabahador kahuman nira ireklamo an labor-only contracting ngan mga pangabuso ha trabaho. Ang Sun Ace nakada ha Valenzuela City ngan naghihimo hin plastic sando bag.

Bayad-danyos, iginpakigbisog ha Batangas. Masobra 1,000 nga parag-uma, parupangisda, trabahador-ha-uma ngan maggagapak (parag-ani han tubo) tikang ha syahan nga distrito han Batangas an tinambong ha iginhimo nga dayalogo ha Department of Agriculture-Calabarzon ha Balayan, Batangas hadton Hunyo 18. Panawagan nira an dagmit nga panhatag hin bayad-danyos para ha epekto han kalamidad ngan an alokasyon han disaster fund para ha tinuod nga rehabilitasyon han ira pakabuhi.

Panlupot han tuna ha Zambales, gin-atuhan. Nagbarikada an mga residente ngan parupangisda han Barangay Taltal, Masinloc, Zambales hadton Hunyo 19 agud pugngan an nakatalaan nga demolisyon ha ira komunidad. Lima nga residente an gin-aresto han mga pulis tungod ha ira pagtipa. Gin-aagaw han pamilya nga Yap an 32-kaektarya nga tuna nga ginhuhulad han mga parag-uma ha lugar tungod kay gintanggal ini ha lupgop han Comprehensive Agrarian Reform Program. Antes an barikada, kinadto an mga parag-uma hadton Hunyo 10 ha Department of Agrarian Reform-Zambales ha bungto han Iba agud igpanawagan an utro nga pag-abre han imbestigasyon han ahensya kasumpay han ira katungod ha tuna.

Priso pulitikal ha Quezon, pagawason! Nagpiket an mga grupo ha tawhanon-nga-katungod ha Quezon hadton Hunyo 16 agud igpanawagan an pagpapagawas ha mga priso pulitikal ha prubinsya. Iginhimo an piket ha bungto han Pagbilao, ngan Lucena City diin ginbista hito manta nga adlaw an kaso nga ginkakaatubang nira Lino Baez ngan Willy Capareño.