Pinarangalan ken pinadayawan dagiti organisasyon, partido ken grupo manipud kadagiti naduma-duma a rehiyon ti Pilipinas ken ballasiw-taaw ni Ka Luis Jalandoni (Ka Louie), a pimmusay idi Hunyo 7 sadiay Utrecht, the Netherlands, iti edad a nubenta (90). Isuna ket mabigbigbig a natibker a mangitantandudo ti kappia, internasyunalista ken pagwadan a rebolusyonaryo.

Ni Ka Louie ket naipasngay idi Pebrero 26, 1935 manipud iti kaputotan a dakkel nga asyendero nga addaan iti nalawa a kaunasan idiay siudad ti Silay, Negros Occidental. Nagadal ken nagturpos isuna iti maysa a pribado nga eskuelaan ket idi agangay nagbalin a padi ti simbaan a Katoliko.

Idi panawen ti diktadura ni Marcos, nagbalin isuna kas napigsa a boses dagiti mairurumen ken magunggundawayan, nangruna dagiti mangmangged iti kaunasan, kas maysa nga aktibista a padi. Isuna ket maysa kadagiti nangibangon ti Christians for National Liberation (CNL) ken nagbalin a paset ti panangidaulo daytoy.

Ni Ka Louie ket nagkameng ti Partido Komunista ti Pilipinas (CPP) idi Marso 1972 ken naaddaan kadagiti naduma-duma nga akem para iti rebolusynaryo a tignayan. Isuna ket pormal a nadutukan a kas maysa nga internasyunal a pannakabagi ti NDFP idi 1977.

Idi 1989, ni Ka Louie ket nadutukan a kas daulo a negosyador ti NDFP kadagiti negosasyon ti pannakikappia ti Gubyerno ti Republika ti Pilipinas (GRP). Manipud idin, ni Ka Louie ket nagbalin a kangrunaan a tao iti panagpirma kadagiti pannakabagi ti NDFP ken GRP kadagiti napateg a katulagan. Isuna ket pormal nga immikkat idi 2016 ken manipud idin ket nagserbi isuna a kas senior adviser iti negotiating panel.

Nalabaga a panagsaludo dagiti buyot ti umili

Dagiti yunit ti New People’s Army (NPA) ket nangitukon iti naulimek a 21-putok a panagsaludo a kas pammadayaw ken panangraem ken ni Ka Louie idi Hunyo 12, iti bilin ti Komite Sentral ti PKP.

Dagitoy a taripnong ket binasa da ti mensahe ti pammadayaw kenkuana ti Komite Sentral.

Dagiti Nalabaga a Mannakigubat ket sangsangkamaysa a nangibalikas ti “Pammadayaw ken karida kenni Ka Louie.” Inrussuat met sadiay Southern Tagalog (ST) ti maysa a “kapehan” tapno pagsaritaan ken padayawan ni Ka Louie. Segun kenni Ka Maxie, maysa a opisyal ti politika ti New People’s Army (NPA), “manamnama ni Ka Louie nga impapusuan nga itandudo tayo ti kari. Ti biag na ket saan a masayang para iti rebolusyon ken ti umili.”

Nagpadayaw met kenni Ka Louie dagiti pang rehiyon a balangay ken dagiti alyado nga organisasyon ti NDFP.

Karaman kadagitoy ti NDF International Office, CNL, Liga ng Agham para sa Bayan, Compatriots, Pambansang Katipunan ng Magbubukid, Kabataang Makabayan, Lupon ng mga Manananggol ng Bayan, Artista at Manunulat ng Sambayanan ken Makabayang Kilusan ng Bagong Kababaihan. Kaaduan a pammadayaw ket naggapu kadagiti organisado nga organisasyon iti isla ti Negros, ti nakaiyanakan ni Ka Louie.

Segun ti Sentral a Komite, baeten ti panagleddaang ti rebolusionaryo a tignayan iti ipupusay ni Ka Louie ket natibker nga ikagkagumaan na nga itultuloy ti patawid na nga naan-anay a panagserbi, agnanayon a kinamapakumbaba, rebolusyonaryo a kinapudno, ken tibker ti panagirussuat ti demokratiko a rebolusyon ti umili aginggana ti balligi.

Lokal ken Internasyonal a Pannakabigbig

Ginasut nga umili ti timmabuno iti pammadayaw nga inrussuat ti Bagong Alyansang Makabayan para kenni Ka Louie iti Unibersidad ti Pilipinas Diliman (UP Diliman) idi Hunyo 16.

Nagtitipon dagiti kabagian, dagiti nakatrabaho ken dagiti nakadua ni Ka Louie, beterano nga aktibista ken dagiti baro nga agtawid iti napanawan na a tignayan iti maysa a nalawa a hall. Ni Ka Louie ket binigbig ken rinaem dagiti pannakabagi ti Gubyerno a Venezuela ken Norway nga timmabuno iti programa. Isuna ket binigbig pay dagiti kameng ti negosasyon ti GRP kadagiti naisayangkat a negosasyon ti kappia.

Ni Ka Louie ket pinadayawan dagiti ligal a nailian-demokratiko nga organisasyon ti naduma-duma a sektor ti kagimongan. Ibilang da ni Ka Louie a kas maysa a naindaklan a pagulidanan ti awan panagimbubukod a dedikasyon ti biag ken pigsa para kadagiti tarigagay ti umili a Pilipino. Manipud iti ruar ti pagilian, inyebkas dagiti partido ken organisasyon manipud Ireland, Estados Unidos, Afghanistan, Germany, Turkey, Kurdistan ken dadduma pay a pagilian ti panangbigbig ken panagraem kenni Ka Louie. Para kadakuada, dakkel ti naitulong ni Ka Louie iti pannakaitandudo ti sangalubongan a tignayan dagiti tattao laban iti imperyalismo ken amin a reaksyon.

Ka Louie Jalandoni, bannuar ken martir dagiti umili a Pilipino!