Pagpatay sa sugyot sa dugang suhulan, gimakmak. Nagprotesta niadtong Hunyo 12 sa Quezon City ang Kilusang Mayo Uno ug mga grupo sa mga mamumuo aron kundenahon ang pagpatay sa rehimeng US-Marcos ug mga alipures niini sa sugyot balaudnon nga magdugang og ₱200 sa inadlawan sa mga mamumuo. Rason sa Senado nga “wala nay panahon” ug “walay igong pagtuon” aron hisgutan ang sugyot sa bicameral conference sa ika-19 nga Kongreso.

Pagpanangtang sa Sun Ace Polymer, gikundena. Nagpiket ang mga trabahante sa Sun Ace Polymer Manufacturing Corporation atubangan sa Department of Labor and Employment-National Capital Region niadtong Hunyo 10 aron iduso ang hinanaling pagbalik sa trabaho sa mga gitangtang nga mga trabahante. Iligal nga gitangtang sa kumpanya ang 31 ka trabahante human nila gireklamo ang labor-only contracting ug mga pagpangabuso sa trabaho. Ang Sun Ace nahimutang sa Valenzuela City ug nagahimo og plastic sando bag.

Pakigbisog alang sa kompensasyon sa Batangas. Kapin sa 1,000 ka mga mag-uuma, mangingisda, mamumuong panguma ug mga tapasero gikan sa unang distrito sa Batangas ang nitambong sa dayalogo nga gihimo sa Department of Agriculture-Calabarzon sa Balayan, Batangas niadtong Hunyo 18. Ilang gipangayo ang hinanaling pag-apud-apod sa kumpensasyon alang sa epekto sa kalamidad ug ang pondo para sa tinuod nga rehabilitasyon sa ilang panginabuhian.

Pagbatok sa pagpangilog og yuta sa Zambales. Nagbarikada ang mga residente ug mag-uuma sa Barangay Taltal, Masinloc, Zambales niadtong Hunyo 19 aron pugngan ang planong demolisyon sa ilang komunidad. Lima ka residente ang nadakpan sa mga pulis tungod sa ilang pagsupak. Giilog sa pamilya Yap ang 32 ka ektaryang yuta nga ginabungkal sa mga mag-uuma sa lugar tungod kay gitangtang kini sa sakop sa Comprehensive Agrarian Reform Program. Sa wala pa ang barikada, miadto ang mga mag-uuma niadtong Hunyo 10 sa Department of Agrarian Reform-Zambales sa lungsod sa Iba aron ipanawagan ang subling pag-abli sa imbestigasyon sa ahensya bahin sa ilang katungod sa yuta.

Buhian ang mga bilanggong pulitikal sa Quezon! Nagpiket ang mga grupo sa tawhanong katungod sa Quezon niadtong Hunyo 16 aron ipanawagan ang pagpagawas sa mga bilanggong pulitikal sa prubinsya. Ang piket gilunsad sa lungsod sa Pagbilao ug Lucena City diin gidungog ang kaso batok nila Lino Baez ug Willy Capareño sa maong adlaw.