Idi Hunyo 12, linagip ti naduma-duma a grupo ti Makabayan ti maika-127 a tawen ti bogus a waya-waya ti pagilian babaen ti panagprotesta iti sango ti embahada ti US idiay Manila. Binatikos da ti umir-irteng a pannakibiang ken interbensyon militar ti US iti Pilipinas ken kriminal a papel ti US iti henosidyo iti Palestine.

Kinondenar da iti agtultuloy a panagpalawa dagiti base militar ti US, umad-adu ti nakaimbak da nga armas ken irusrussuat na a wargames iti Pilipinas. Ammo da nga us-usaren ti aso-aso a rehimen US-Marcos ti riri iti baybay ti Pilipinas iti China tapno addaan rason ti panagsagana ti gyera tapno usaren ti pagilian a pagirussuatan ti gubat.

Daytoy umuna a kagudua laeng a tawen, tallo a dadakkel a war games ti agtutuon nga inrussuat ti US, sakbay ken kalpasan dagiti dadakkel a Balikatan. Karaman ditoy ti rinibo a tropa ti Amerikano, kagiddan dagiti ginasut a lugan ken armas nga impan iti naduma-duma a suli ti pagilian. Karaman dagiti inusar kadagiti war games ti Thyphon Mid-Range Capability missile System, Marine Expeditionary Ship Interdiction System (NMESIS) ken Marine Air Defense Integrated System (MADIS). Iti laeng napalabas, inwaragawag ti US ti panag nayon ti iyimbak a missile system iti pagilian.

Maysa kadagiti war games daytoy ti Salaknib phase 2 nga inrussuat iti Nueva Ecija, Cagayan ken Batanes, inggana Hunyo 20. Kas idi 2024, indauluan daytoy ti Joint Pacific Multinational Readiness Center Exportable (JPMRC-X) ti US para iti “makapapati a panagtinnulong ” dagiti soldado ti US, Pilipinas ken dadduma pay kontra iti “pangta ti seguridad iti Indo-pacific”, nga awan ti sabali nga dakdakamaten ti US no di ti China. Kagiddan ti Salaknib 2, inrussuat ti Kamandag iti Luzon ken Kasangga ti Pilipinas ken Australia iti Mindanao.

Naisang- sangayan ti kina-aso-aso ti rehimen ni Marcos iti kaadu a katulagan militar a sinerrek na ken ti pasista nga Armed Forces of the Philippines (AFP) kadagiti kaalyado ti imperyalismo nga US.

Iti bala-bala ti Indo Pacific Strategy ti US, nakikaykaysa ni Marcos idi 2023 tapno paaduen dagiti base militar ti US iti pagilian babaen ti EDCA. Pimmauneg isuna ken ti AFP iti Bilateral Defense Guidelines ken pinormalisa ti panangibingay iti US ti delikado a datos ti paniktik mainaig ti seguridad ti pagilian iti pinirmaan na a Military Intelligence Sharing Agreement idi 2024.

Saan a bumaba iti lima pay a katulagan militar kadagiti alyado ti US ti pinirmaan ken isaruno a pirmaan ti rehimen manipud 2022 inggana 2025. Kadagitoy a katulagan, inikkan ni Ferdinand Marcos Jr ti awan patengga a pannakibiang dagiti gangannaet a tropa kadagiti rekurso, kadagaan, tangatang ken baybay iti Pilipinas. Pinalubusan na met dagiti tropa a Japanese, New Zealander, Canadian ken French, ken no siasino pay nga awisen ti US nga agdakiwas iti Pilipinas nga awan ti sungsungbatan kadagiti lokal a pagannurutan ken linteg.

Maysa kadagitoy a katulagan ti Japan Philippines Reciprocal Access Agreement (RAA) a pinasingkedan ti parlamento ti Japan idi Hunyo 6. Immuna a pinirmaan dagiti mangibagbagi ti dua a pagilian iti napalabas a tawen ken rinatipikaran ti Senado iti Pilipinas idi Disyembre 2024. Agpada iti Japan ken Pilipinas, nairut nga sinupiat dagiti umili daytoy a katulagan a kunada nga agserserbi laeng daytoy iti heopulitikal nga ambisyon ti Japan ken US.

Idi Abril, nagsaruno a pinirmaan ti rehimeng Marcos ti Defense Cooperation Agreement karaman ti Germany ken ti Status of Visiting Forces Agreement (SOVFA) karaman ti New Zealand. Ti umuna, ket tapno mailako ti Germany dagiti armas daytoy iti Pilipinas nga addaan pammalubos ti US, kabayatan nga iti maikadua ket tapno palubusan dagiti tropa ti New Zealand a sumrek ken rummuar iti pagilian tapno lumaok kadagiti war games ken kombat operasyon nga idauluan ti US. Dua pay a SOVFA, iti Canada ken France, nga addaan ti agpada a turungen ken gapu, ti naikeddeng a pirmaan ni Marcos ita a tawen. Nayon dagitoy iti SOVFA a pinirmaan ti Pilipinas iti Australia idi 2007.

Babaen kadagitoy a katulagan, inallukoy ni Marcos dagiti amin a kakomplut ti US a mangilupit-lupit iti soberenya ti Pilipinas ken aramaten ti pagilian ken dagiti umili a Pilipino a kas pyesa ti ay-ayam a makisinnupiat iti China. Dakkel daytoy a biddut ta ad-adda pay ti pannakaisina ti Pilipinas kadagiti kabangibang a pagilian ken manginayon ti riribuk iti rehion ti Asya.