Giparangalan ug gipasidunggan sa mga organisasyon, partido ug grupo gikan sa lain-laing rehiyon sa Pilipinas ug ubang nasud si Ka Luis Jalandoni (Ka Louie), nga namatay niadtong Hunyo 7 sa Utrecht, the Netherlands, sa edad nga 90. Giilala siya isip usa ka lig-ong tigpanalipud sa kalinaw, internasyunalista ug ehemplong rebolusyonaryo.

Natawo si Ka Louie niadtong Pebrero 26, 1935 sa pamilya sa dagkung mga asendero nga adunay halapad nga mga katubhan sa Syudad sa Silay, Negros Occidental. Nag-eskwela ug nakahuman siya sa pribadong eskwelahan ug nahimong pari sa Simbahang Katoliko.

Sa panahon sa diktaduryang Marcos, nagsilbi siyang kusog nga tingog sa mga nilupigan ug pinahimuslan, ilabina sa mga magmumuong-panguma sa katubhan, isip usa ka aktibistang pari. Usa siya sa mga nagtukod sa Christians for National Liberation (CNL) ug nahimong bahin sa liderato niini.

Namembro si Ka Louie sa Partido Komunista sa Pilipinas (PKP) niadtong Marso 1972 ug nagpatuman og lain-laing katungdanan alang sa rebolusyonaryong kalihukan. Pormal siyang gitahasan isip Internasyunal nga Representante sa National Democratic Front of the Philippines (NDFP) niadtong 1977.

Niadtong 1989, gitudlo si Ka Louie isip tsirman negosyador sa NDFP sa negosasyong pangkalinaw uban sa Gubyerno sa Republika sa Pilipinas (GRP). Sukad niadto, nahimong yaweng personalidad si Ka Louie sa pagpirma sa mga representante sa NDFP ug GRP sa mga mahinungdanong kasabutan. Pormal siyang minaog sa pwesto niadtong 2016 ug nagsilbi isip senior adviser sa negotiating panel sukad niadto.

Pulang saludo gikan sa hukbong bayan

Naghalad og hilum nga 21-gun salute ang mga yunit sa Bagong Hukbong Bayan (BHB) isip pagparangal ug pagpasidungog kang Ka Louie niadtong Hunyo 12, subay sa mando sa Komite Sentral sa PKP. Gibasa sa mga tigum ang mensahe sa parangal kaniya gikan sa Komite Sentral.

Hiniusang gibasa sa mga Pulang manggugubat ang “Parangal ug Saad para kang Ka Louie.” Gipahigayon usab sa Southern Tagalog ang “Kapehan” aron hisgutan ug pasidunggan si Ka Louie. Sumala kang Ka Maxie, usa ka upisyal sa pulitika sa BHB, “Makasalig si Ka Louie nga among isilsil sa among kasingkasing ug buhaton ang saad. Dili masayang ang iyang kinabuhi nga gihalad para sa rebolusyon ug sa katawhan.”

Nagparangal usab kang Ka Louie ang mga panrehiyong balangay ug kaalyadong organisasyon sa NDFP. Lakip dinhi ang NDF International Office, CNL, Liga ng Agham para sa Bayan, Compatriots, Pambansang Katipunan ng mga Magbubukid, Kabataang Makabayan, Lupon ng mga Manananggol ng Bayan, ug Artista at Manunulat ng Sambayanan ug Makabayang Kilusan ng Bagong Kababaihan. Kadaghanan sa mga pahayag gikan sa mga organisasyon nga nakabase sa isla sa Negros, ang yutang natawhan ni Ka Louie.

Sumala sa Komite Sentral, sa kasub-anan sa rebolusyonaryong kalihukan sa pagkamatay ni Ka Louie, hugot niining gipanumpa nga ipadayon ang iyang legasiya sa walay pagpanuko nga pag-alagad, walay kinutubang pagkamapaubsanon, rebolusyonaryong integridad, ug dedikasyon sa pagpadayon sa demokratikong rebolusyon sa katawhan hangtud sa hingpit nga kadaugan.

Lokal ug internasyunal nga pag-ila

Gatusan ang nitambong sa pagtigum-parangal nga gipahigayon sa Bagong Alyansang Makabayan para kang Ka Louie sa University of the Philippines-Diliman niadtong Hunyo 17. Nagkahiusa sa usa ka hawanan ang mga paryente, katrabaho ug kauban ni Ka Louie, mga beteranong aktibista ug ang bag-ong henerasyon ug mga kabatan-onan nga manunod sa iyang nabiyaan nga pakigbisog.

Giila ug gidayeg si Ka Louie sa mga representante sa gubyerno sa Venezuela ug Norway nga nakighiusa sa programa. Giila usab siya sa mga myembro sa negotiating panel sa GRP sa mga miaging negosasyong pangkalinaw.

Gipasidunggan si Ka Louie sa mga ligal nga nasudnon-demokratikong organisasyon gikan sa lain-laing sektor sa katilingban. Ilang gitan-aw si Ka Louie isip maayong ehemplo sa walay pagpanuko nga paghalad sa kinabuhi ug kusog alang sa tinguha sa katawhang Pilipino.

Gikan sa gawas sa nasud, nagpahayag og pag-ila kang Ka Louie ang mga partido ug organisasyon gikan sa Ireland, United States, Afghanistan, Germany, Turkey, Kurdistan ug uban pang mga nasud. Para kanila, daku kaayo ang natampo ni Ka Louie sa pagpalambo sa kalibutanong kalihukan sa katawhan batok sa imperyalismo ug tanang reaksyon.