Ginpasidunggan ngan ginsaludaran han mga organisasyon, partido ngan grupo tikang ha magkalain-lain nga rehiyon han Pilipinas ngan iba nga nasud hi Ka Luis Jalandoni (Ka Louie), nga namatay hadton Hunyo 7 ha Utrecht, the Netherlands, ha edad nga 90. Ginkilala hiya komo usa nga madig-on nga tag-undong han kamurayawan, internasyunalista ngan modelo nga rebolusyunaryo.

Igin-anak hi Ka Louie hadton Pebrero 26, 1935 ha tulin han dagko nga asendero nga may higluag nga tubuhan ha Silay City, Negros Occidental. Nag-eskoyla ngan nakahuman hiya ha pribado nga eskoylahan ngan ha dayuday nagin padi han singbahan Katoliko.

Ha panahon han diktadura nga Marcos, nagserbe hiya nga makusog nga tingog han tinalumpigos ngan tiniyupi, labina han mga trabahador-ha-uma ha tubuhan, komo usa nga aktibista nga padi. Usa hiya ha mga nagtukod ha Christians for National Liberation (CNL) ngan nagin kaparte han pamunuan hini.

Nagin kaapi hi Ka Louie han Partido Komunista ng Pilipinas (PKP) hadton Marso 1972 ngan nagpatuman hin magkalain-lain nga buruhaton para ha rebolusyunaryo nga kagiusan. Pormal hiya nga igintuin komo Internasyunal nga Tinaglawas han National Demoratic Front of the Philippines hadton 1977.

Hadton 1989, igintuin hi Ka Louie komo puno nga negosyador han NDFP ha negosasyon pankamurayawan ha Gubyerno han Republika han Pilipinas (GRP). Tikang hadto, nagin yawe nga personahe hi Ka Louie ha pagpirma han mga tinaglawas han NDFP ngan GRP ha mga mahinungdanon nga kasarabutan. Pormal hiya nga linusad ha pwesto hadton 2016 ngan nagserbe nga senior adviser ha negotiating panel tikang hadto.

Pula nga saludo han hukbo han katawhan

Naghalad hin mamingaw nga 21-gun salute an mga yunit han Bagong Hukbong Bayan (BHB) komo pagpasidungog ngan pagsaludar kan Ka Louie hadton Hunyo 12, subay ha katugunanan han Komite Sentral han PKP. Ginbasa hini nga mga katitirok an mensahe han pagpasidungog ha iya han Komite Sentral.

Duruyog nga ginluwas han mga Pula nga mangaraway an “Pasidungog ngan Panaad kan Ka Louie.” Iginlansar liwat ha Southern Tagalog an “Kapehan” agud talakayon ngan dayawon hi Ka Louie. Sigon kan Ka Maxie, usa nga upisyal ha pulitika han BHB, “Makakatapod hi Ka Louie nga igtatanum namon ha kasingkasing ngan tatagan kinabuhi an panaad. Diri makakarag an iya kinabuhi nga iginhalad para ha rebolusyon ngan katawhan.”

Nagpasidungog liwat kan Ka Louie an mga panrehiyon nga tsapter ngan alyado nga organisasyon han NDFP. Kalakip hini an NDF International Office, CNL, Liga ng Agham para sa Bayan, Compatriots, Pambansang Katipunan ng mga Magbubukid, Kabataang Makabayan, Lupon ng mga Manananggol ng Bayan, Artista at Manunulat ng Sambayanan ngan Makabayang Kilusan ng Bagong Kababaihan. Pinakadamo nga pahayag an nagtikang ha mga organisasyon nga nakabase ha isla han Negros, tuna nga gintubuan ni Ka Louie.

Sigon ha Komite Sentral, ha pagkasubo han rebolusyunaryo nga kagiusan ha pagkamatay ni Ka Louie madig-on hini nga iginsasaad nga igpapadayon an iya sulundanon han waray pagkamakaiya nga pagserbe, waray tubtuban nga kamapainubsanon, rebolusyunaryo nga katangkuran, ngan panindugan ha paglansar han demokratiko nga rebolusyon han katawhan hasta nga hul-os nga makab-ot an kadaugan.

Lokal ngan internasyunal nga pagkilala

Gatus-gatos an tinambong ha katitirok-pasidungog nga iginlansar han Bagong Alyansang Makabayan para kan Ka Louie ha University of the Philippines-Diliman hadton Hunyo 16. Nagkaurupod ha usa nga bulwagan an mga kaurupdan, nakatrabaho ngan nakaupod ni Ka Louie, mga beterano nga aktibista ngan an bag-o nga henerasyon ngan mga kabatan-unan nga sumurunod han ginbilin niya nga pakigbisog.

Ginkilala ngan gindayaw hi Ka Louie han tinaglawas han gubyerno han Venezuela ngan Norway nga nakig-usa ha programa. Ginkilala liwat hiya han mga nagin kaparte han negotiating panel han GRP ha naglabay nga mga negosasyon pankamurayawan.

Ginpasidunggan hi Ka Louie han mga ligal nga nasyunal-demokratiko nga organisasyon han magkalain-lain nga sektor han katilingban. Iginkunsidera nira hi Ka Louie komo maupay nga pananglitan han waray pagkamakaiya nga paghalad han kinabuhi ngan kusog para ha ungara han katawhan Pilipino.

Tikang ha gawas han nasud, nagpahayag hin pagkilala kan Ka Louie an mga partido ngan organisasyon tikang ha Ireland, United States, Afghanistan, Germany, Turkey, Kurdistan ngan iba pa nga mga nasud. Para ha ira, dako an amot ni Ka Louie ha pagpapasulong han pankalibutan nga kagiusan han katawhan kontra ha imperyalismo ngan ngatanan nga reaksyon.