Ginpasidunggan kag ginsaluduhan sang mga organisasyon, partido kag grupo halin sa lain-lain nga rehiyon sang Pilipinas kag iban nga pungosd si Ka Luis Jalandoni (Ka Louie), nga nagtaliwan sadtong Hunyo 7 sa Utrecht, the Netherlands, sa edad nga 90. Ginkilala siya bilang isa ka malig-on nga tigtib-ong sang kalinong, internasyunalista kag huwaran nga rebolusyonaryo.

Ginbun-ag si Ka Louie sadtong Pebrero 26, 1935 sa pamilya sang mga dalagko nga asyendero nga may malagpad nga katubuhan sa Silay City, Negros Occidental. Nag-eskwela kag nagtapos siya sa pribado nga eskwelahan kag sang ulihi nangin pari sang simbahan Katoliko.

Sa panahon sang diktaduryang Marcos, nagserbe siya nga mabaskog nga tingog sang ginapigos kag ginahimuslan, ilabina sang mga mamumugon sa uma sa katubuhan, bilang isa ka aktibista nga pari. Isa siya sa mga nagtukod sang Christians for National Liberation (CNL) kag nangin kabahin sang pamunuan sini.

Nangin katapo si Ka Louie sang Partido Komunista ng Pilipinas (PKP) sadtong Marso 1972 kag nagtungod sang lain-lain nga katungdanan para sa rebolusyonaryong kahublagan. Pormal siya nga gintalana bilang Internasyunal nga Tiglawas sang National Demoratic Front of the Philippines sadtong 1977.

Sadtong 1989, gintalana si Ka Louie bilang pinuno nga negosyador sang NDFP sa negosasyon pangkalinong sa Gobyerno sang Republika sang Pilipinas (GRP). Halin sadto, nangin yabe nga personahe si Ka Louie sa pagpirma sang mga tiglawas sang NDFP kag GRP sa mga signipikante nga kasugtanan. Pormal siya nga nagpanaog sa pwesto sadtong 2016 kag nagserbe nga senior adviser sa negotiating panel halin sini.

Pula nga saludo sang hukbong bayan

Naghalad sang malinong nga 21-gun salute ang mga yunit sang Bagong Hukbong Bayan (BHB) bilang pagpasidungog kag pagsaludo kay Ka Louie sadtong Hunyo 12, sandig sa direktiba sang Komite Sentral sang PKP. Ginbasa sa mga pagtililipon nga ini ang mensahe sang pasidungog sa iya sang Komite Sentral.

Ululupod nga ginhambal sang mga Pulang Hangaway ang “Pasidungog kag Panumpa kay Ka Louie.” Ginlunsar man sa Southern Tagalog ang “Kapehan” agud talakayon kag pasidunggan si Ka Louie. Suno kay Ka Maxie, isa ka opisyal sa pulitika sang BHB, “Makasalig si Ka Louie nga itudok namon sa amon taguipusoon kag igakabuhi namon ang panumpa. Indi mauyang ang iya kabuhi nga ginhalad para sa rebolusyon kag pungsod.”

Nagpasidungog man kay Ka Louie ang mga pangrehiyon nga tsapter kag alyado nga organisasyon sang NDFP. Kalakip diri ang NDF International Office, CNL, Liga ng Agham para sa Bayan, Compatriots, Pambansang Katipunan ng mga Magbubukid, Kabataang Makabayan, Lupon ng mga Manananggol ng Bayan, kag Artista at Manunulat ng Sambayanan kag Makabayang Kilusan ng Bagong Kababaihan. Pinakadamo nga pahayag ang naghalin sa mga organisasyon nga nakabase sa isla sang Negros, duta nga gindak-an ni Ka Louie.

Suno sa Komite Sentral, sa pagtangis sang rebolusyonaryong kahublagan kag pagtaliwan ni Ka Louie malig-on sini nga ginapangako nga ipadayon ang iya ginpapanubli sang wala sang pagpangduha-duha nga pag-alagad, wala sang dulunan nga pagkamapainubuson, rebolusyonaryong katampad, kag panindugan sa paglunsar sang demokratikong rebolusyon sang banwa tubtob sa himpit na nga maagum ang kadalag-an.

Lokal kag internasyunal nga pagkilala

Ginatos ang nagtambong sa pagtipon-pasidungog nga ginlunsar sang Bagong Alyansang Makabayan para kay Ka Louie sa University of the Philippines-Diliman sadtong Hunyo 16. Nag-ululupod sa isa ka bilding ang mga himata, nakatrabaho kag nakaupod ni Ka Louie, mga beterano nga aktibista kag ang bag-o nga henerasyon kag mga pamatan-on nga magapanubli sang ginbilin niya nga paghimakas.

Ginkilala kag gindayaw si Ka Louie sang tiglawas sang gobyerno sang Venezuela kag Norway nga nakig-isa sa programa. Ginkilala man siya sang mga nangin kabahin sang negotiating panel sang GRP sa nagligad nga mga negosasyon pangkalinong.

Ginsaluduhan si Ka Louie sang mga ligal nga pungsodnon-demokratikong organisasyon sang lain-lain nga sektor sang katilingban. Ginkabig nila si Ka Louie bilang maayo nga halimbawa sang wala sang pagpangduha-duha nga paghalad sang kabuhi kag kusog para sa kawsa sang pumuluyong Pilipino.

Halin sa luwas sang pungsod, nagpahayag sang pagkilala kay Ka Louie ang mga partido kag organisasyon halin sa Ireland, United States, Afghanistan, Germany, Turkey, Kurdistan kag iban pa nga mga pungsod. Para sa ila, dako ang naamot ni Ka Louie sa pagsulong sang pangkalibutanon nga kahublagan sang pumuluyo batuk sa imperyalismo kag tanan nga reaksyon.