Liboan ka mga tawo ang nagprotesta atubangan sa Senado sa Pasay City niadtong Hunyo 11 aron iduso ang pagtaral kang Vice President Sara Duterte sa kasong impeachment batok kaniya. Dismayado ang katawhan sa daw pagpanalipud sa Senado nga nagsilbing impeachment court kang Duterte pinaagi sa mga taktika nga tinuyong paglangan sa proseso sa pagtaral.

Gimakmak sa Bagong Alyansang Makabayan (Bayan) ug uban pang grupo ang mga maniobra sa mga senador nga pabor kang Duterte ug bisan si Senate President Francis Escudero. Unang gitakda niadtong Hunyo 2 ang pormal nga pagsugod sa impeachment court human sa upat ka bulan nga paglangan, apan gibalhin kini sa Hunyo 11, ang katapusang adlaw sa sesyon sa Senado.

Sa pagpanghingusog sa pipila ka senador, napugos si Escudero nga tigumon na ang impeachment court niadtong Hunyo 10. Niadtong adlawa, giduso ni Senador Bato dela Rosa nga ibasura ang kaso sa impeachment. Wala mosugot ang kadaghanan sa mga senador apan mibotar ang mayorya (18 ka senador) pabor sa pagbalik sa kaso sa House of Representatives.

Gibalik kini sa kongreso aron kumpirmahon kung misunod ba sa konstitusyon ang proseso sa impeachment batok kang Duterte. Gimakmak kini nga lakang sa mga grupo ug giingon sa daghang mga abugado ug eksperto sa balaod nga supak kini sa konstitusyon.

Niadtong Hunyo 11, adunay mga protesta usab sa Iloilo City ug Bacolod City. Ang mga myembro sa Bayan nagpahigayon og demonstrasyon niadtong Hunyo 12 sa Cebu City ug Hunyo 13 sa Baguio City ug La Union batok sa maong mga maniobra.

Lain pang mga grupo ug alyansa ang nagprotesta usab batok sa paglangan sa pagtaral kang Sara Duterte.