Linibo ka pumuluyo ang nagprotesta sa atubang sang Senado sa Pasay City sadtong Hunyo 11 agud iduso ang pagbista kay Vice President Sara Duterte sa kaso niya nga impeachment. Dismayado ang pumuluyo sa daw pagprotektar sang Senado, nga nagatindog nga impeachment court, kay Duterte sa ginahimo sini nga mga taktika sang hungod nga pagpaatrasar sa pagbista.

Ginbatikos sang Bagong Alyansang Makabayan (Bayan) kag iban pa nga grupo ang mga maniobra sang mga maka-Duterte nga senador kag bisan ni Senate President Francis Escudero. Una nga gintalana ang petsa sang pormal nga pagbukas sang impeachment court sadtong Hunyo 2, pagkatapos sang apat ka bulan nga pagka-atrasar, apang ginbalhin ini sa Hunyo 11, ulihi nga adlaw sang sesyon sang senado.

Sa duso sang pila ka senador, napilitan si Escudero nga tipunon na ang impeachment court sadtong Hunyo 10. Sa adlaw nga ini, ginduso ni Sen. Bato dela Rosa nga ibasura ang kaso nga impeachment. Wala nagpasugot ang mga senador diri apang nagboto ang mayoriya (18 senador) pabor sa pag-remand ukon pagpabalik sang reklamo sa House of Representatives.

Ginbalik ini sa manubo nga kapulungan agud kumpirmahon kuno kon nagsunod sa konstitusyon ang proseso sang impeachment sang mga kongresista batuk kay Duterte. Ginbatikos sang mga grupo ang tikang nga ini kag nagsiling ang madamo nga abogado kag eksperto sa layi nga lapas ini sa konstitusyon.

Sadtong Hunyo 11, may yara man sang mga protesta sa Iloilo City kag Bacolod City. Naglunsar man ang mga katapo sang organisasyon sang Bayan sang demonstrasyon sadtong Hunyo 12 sa Cebu City kag sadtong Hunyo 13 sa Baguio City kag La Union batuk sa mga maniobra nga ini.

Naghublag man ang iban nga mga grupo kag alyansa batuk sa pagpaatrasar sa pagbista kay Sara Duterte.