Yukut-yukot nga katawhan an nagprotesta ha atubangan han Senado ha Pasay City hadton Hunyo 11 agud iduso an pagbista kan Vice President Sara Duterte ha kaso niya nga impeachment. Dismayado an katawhan ha baga pagprotekta han Senado, nga natindog nga impeachment court (korte), kan Duterte ha ginhimo hini nga mga taktika han tuyo nga pagdelatar ha pagbista.

Ginsukna han Bagong Alyansang Makabayan (Bayan) ngan iba nga grupo an mga maniobra han mga maka-Duterte nga senador ngan bisan ni Senate President Francis Escudero. Syahan nga igintalaan an petsa han pormal nga pag-abre han impeachment court hadton Hunyo 2, kahuman han upat kabulan na nga pagdelatar, kundi iginbalhin ini ha Hunyo 11, katapusan nga adlaw han sesyon han senado.

Ha duso han pira nga mga senador, napugos hi Escudero nga bug-uson na an impeachment court hadton Hunyo 10. Hiton nga adlaw, iginduso ni Sen. Bato dela Rosa nga ipabasura an kaso nga impeachment. Waray umabuyon an mga senador hini kundi binoto an mayoriya (18 senador) pabor ha pag-remand o pagpapabalik han reklamo ha House of Representatives.

Iginbalik ini ha uruubos nga kapunungan agud kumpirmahon kunuhay kun sinunod ha konstitusyon an proseso han impeachment han mga kongresista kontra kan Duterte. Ginsukna han mga grupo ini nga pitad ngan ginsering han damo nga abugado ngan eksperto ha balaud nga talapas ini ha konstitusyon.

Hadton Hunyo 11, nagkamayda liwat hin mga protesta ha Iloilo City ngan Bacolod City. Naglansar naman an mga kaapi nga organisasyon han Bayan han demonstrasyon hadton Hunyo 12 ha Cebu City ngan hadton Hunyo 13 ha Baguio City ngan La Union kontra hini nga mga maniobra.

Ginios liwat an iba nga mga grupo ngan alyansa kontra ha pagpadelatar ha pagbista kan Sara Duterte.