Naghapag sang petisyon ang mga mangunguma sa Barangay Bantud, San Roque kag iban pa nga barangay sa Guimba, Nueva Ecija agud himuon nga ₱20 kada kilo ang minimum ang baklanay sang preska nga humay subong nga bulan sang Hulyo. Siling nila, nagalab-ot sa ₱14 kada kilo ang kapital sa humay apang ginabakal lang ini sa presyo nga ₱10-12. Sa kasagsagan sang pag-ani, may mga komersyante nga ginapausmod pa ang baklanay padulong sa ₱5/kilo.

Wala sang paugahan kag wala man sang mga trak para madala sang mga mangunguma sa National Food Authority ang ila ani. Kulang sa pondo ang ahensya para makabenepisyo sila. Tungod sini, nagakapilitan sila nga batunon ang pagpangbarat sang mga komersyante.

Isa sa pinakadako nga prodyuser sang bugas ang Nueva Ecija, kag ang Guimba sa partikular. Sa datos para sa una nga kwarto sang 2023, nakaani diri sang 345,547 metriko tonelada (MT) sang humay. 39.8% ini sa pangkabug-osan nga produksyon sang humay sa Central Luzon. Ginabug-os man sang Central Luzon ang 18.1% sang pungsodnon nga output sang humay.

Sadtong Hunyo, nagtukod ang NFA sang ₱63.9 milyon nga Rice Processing System (RPS) II Facility sa Muñoz City. Masobra 19 kilometro ang kalayuon sini sa San Roque, kag makasarang magserbisyo sa tubtob 6,000 ka mangunguma. Sa Guimba pa lang, may yara na ginabana-bana nga 7,500–15,000 ka mangunguma.

Magluwas sa ₱20 nga baklanay, ginademanda man sang mga mangunguma nga ibasura ang Rice Liberalization Law (RLL) ukon RA 11203 tungod suno sa ila ginatulod lang sini ang gobyerno nga magsalig sa agrikultura sang iban nga pungsod para sa kinahanglanon sang mga Pilipino.

Hugot nga ginasuportahan sang Kilusang Magbubukid ng Pilipinas (KMP) ang panawagan sang mga mangunguma sa Guimba.

Siling sini, ginagamit sang mga komersyante ang pagbaha sa merkado sang imported nga bugas agud labi pa nga ibagsak ang baklanay sang lokal nga humay. Sa kahimtangan nga ini, nagakapierde kag mas nagakalubong sa utang ang mga mangunguma sa humay. Solo ang mga trader kag importer ang nagabenepisyo.