Sa nagligad nga duha ka tuig, todo-todo ang pagpalapad sang US sang presensyang militar kag pagtukod sang mga estratehikong imprastruktura militar sini sa Pilipinas. Sadtong 2024, ginpwesto sini ang Typhon Missile System sa norte sang Luzon. Ginsundan ini subong nga tuig sang pagsulod sang NMESIS, MADIS kag iban pa nga mga armas pang-gyera.

Sini man nga tuig, gin-angkon sang US ang pasilidad nabal sa Oyster Bay sa Palawan, ginmando ang pagtukod sang pabrika sang bala sa Subic kag ginpaguwa ang pauna nga pondo para sa konstruksyon sang Subic-Clark-Manila-Batangas Railway. (Tan-awa ang kaangot nga artikulo sa AB, Hulyo 7, 2025.) Kabahin ang tanan nga ini sa paghanda sang US sa pungsod bilang isa ka dako nga forward operating base sa ginasulsolan sini nga imperyalistang gyera batuk sa China.

Maathag nga tuman na kalapaw sa siyam ka “nakasugtan nga EDCA site” (Enhanced Defense Cooperation Agreement) ang gin-angkon kag ginagamit sang US nga mga base sa Pilipinas. Sa tabon sang wala-untat nga mga war games, ginpadasig sang US ang konstruksyon sang mga baraks, bodega kag iban pa nga imprastruktura sa sulod sang mga kampo sang Armed Forces of the Philippines (AFP) para balayan sang nagadako nga isip sang mga tropa, gamit kag salakyan Amerikano nga bug-os nga tuig nga magapabilin sa sulod kag palibot sang pungsod.

Sadtong Hunyo, gin-aprubahan sang Kongreso sang US ang $1-$5 bilyon nga pondo para sa “upgrade” sang pantalan nga nabal sang AFP sa Oyster Bay. Ginagamit na sang US ang pantalan para sa mga “freedom of navigation operation” kag “joint patrol” sa South China Sea, kaupod ang Australia kag Japan. Halin pa 2020 nga gintransporma sang US ang malinong nga komunidad sang mga mangingisda diri padulong sa isa ka yabe nga pasilidad para sa mga barko kag drone pangdagat nga ginagamit sini para birahon ang mga barkong Chinese kag pataason ang tensyon sa South China Sea. Ginapabula sang AFP kag US ang mga patrolya bilang “pagpangapin sa mangingisda nga Pilipino,” apang sa aktwal, ang US kag higante nga mga barko sini ang nagadingot sa ila palangabuhian sa South China Sea kag malapit nga kadagatan.

Kadungan sini, nabalita sining Hulyo ang pagtukod sang US sang isa pa ka baseng nabal sa kadagatan sang Palawan, sa atubang sang munisipalidad sang Quezon. Suno sa report, napili ang lokasyon tungod sa kalapiton sini sa Second Thomas Shoal, isa sa ginhalinan sang konplikto pangdagat sa tunga sang Pilipinas kag China. Diri ibutang ang mga “inflatable boat” nga ginagamit sa pag-atake kag dugang sa ginagamit na sang militar sang Pilipinas sa pakig-gitgitan sini sa mga barko sang China. Target sang US nga paganahon ang base sa una nga kwarto sang 2026.

Sini man nga tuig, ginsugdan na nga dagwayan sang US ang plano sini nga gamiton ang Pilipinas bilang dako nga tambakan sang gamit pang-gyera. Santo ini sa 2025 Joint Vision Statement on Defense Industrial Cooperation nga ginpirmahan sang rehimen Marcos kag gobyerno ni Donald Trump sadtong Marso. Pamaagi ini sang US agud maseguro ang madasig kag indi mautod nga suplay sang gamit pang-gyera oras nga maglupok ang inter-imperyalistang gyera.

Sa tabon sang “kolaborasyon” kag “pagpauswag sang kapasidad sa depensa sang AFP,” itukod sang US sa lain-lain nga bahin sang pungsod ang mga pabrika sini sang bala, unmanned systems (drone), pasilidad para magproseso sang mga “kritikal nga mineral” nga ginagamit sa mga bomba, kag “additive manufacturing” kasubong sang 3D printing.

Sadtong Mayo, ginpwesto na sang US sa Fort Magsaysay sa Tarlac ang isa ka 3D printer nga may ikasarang nga maghimo sang mga gagmay nga drone (ginatawag nga first-person view ukon FPV drone) nga santo sa tereyn kag klima sang Pilipinas. Gingamit ang mga drone nga ini sa ginlunsar nga Salaknib Exercises Phase 2 agud “bahaon sang mata” ang kagulangan kag kabaryuhan sa Northern Luzon. Kabulig sa aktibidad nga ini ang 7th IB kag 5th IB sang AFP. Antes pa sini, ginbukas na sang AFP kag rehimen Marcos ang Aurora para mag-manupaktura ang US sang mga drone sadtong 2024.

Ang mga pabrika, makina kag gamit pang-gyera nga itambak sa Pilipinas direkta nga pagadumalahan sang militar kag mga gaway sang mga kapitalista sa industriyang militar sang US.