Mga kababaehan, nagprotesta batuk sa nagagrabe nga kagutuman. Bitbit ang mga kaldero kag kaserola, gin-uyog sang mga myembro sang Gabriela, Gabriela Women’ Party kag Amihan ang Department of Agriculture sadtong Hulyo 7 tuhoy sa nagasingki nga kagutuman sang pumuluyo. Ginhambal nila sa sarbey sang sini lang sa Social Weather Stations, nga nagasiling nga isa sa kada lima ka pamilya nga Pilipino, ukon 27.2% ang nagaantus sang “involuntary hunger” ukon kagutuman nga dulot sang kaimolon, kalakasan ukon pagbag-o sang palibot.

Mga mamumugon pangpubliko para sa dugang nga sweldo kag kasegurohan sa trabaho. Nag-ululupod ang mga empleyado, manunudlo kag mamumugon pang-ikaayong-lawas sa pangpubliko nga sektor sa isa ka protesta sadtong Hulyo 11 sa Quezon City para ipanawagan sa rehimen Marcos ang dugang nga sweldo kag kasegurohan sa trabaho. Ginpatigayon nila ang hublag pila ka semana antes ang ika-4 nga state of the nation address ni Ferdinand Marcos bilang pagduon sa madugay na nila nga demanda. Mayor nila nga panawagan ang pagsabat sang estado sa naga-usmod nga kalidad sang pangabuhi sang mga empleyado sa atubang sang nagataas nga implasyon.

Pagtukod sang Ahunan Dam, liwat nga ginapamatukan sang mga Lagunense. Kapin sa isa ka libo ka residente sang Pakil, Laguna, kaupod ang mga organisasyon sang tawong-simbahan, pamatan-on, mangunguma, mangingisda, kag mga tigpangapin sang kapalibutan, ang nagmartsa sadtong Hulyo 5 agud ipabutyag ang ila hugot nga pagpamatuk sa ginapatukod nga Ahunan Dam. Halin sa Saint Peter of Alcantara Parish Church, nagmartsa ang mga ralyista padulong sa opisina sang Ahunan Power Inc., kon diin ginbasa ang pahayag sang paghiliusa kag ginpahayag ang kaakig sang pumuluyo.

Bag-o nga CBA, napadaog sa Fuji Electric Philippines. Sa padayon nga pagpang-ipit, napadaog sang Lakas ng Nagkakaisang Manggagawa sa Fuji Electric Philippines Inc. (LNMFEP-OLALIA-KMU) ang dugang nga sweldo kag iban pa nga mga benepisyo para sa bag-o nga collective bargaining agreement. Tuig-tuig sila nga makakuha sang dugang nga ₱50 sa sulod sang tatlo ka tuig, makabaton sang alawans sa pagkaon, bugas kag iban pa. Ang kumpaniya paktorya sang semikonduktor nga nakabase sa Laguna.