Asod-asod nga petisyon ang ginsumiter sang kampo ni anay presidente Rodrigo Duterte agud paatrason ang pagbista sa iya kaso nga krimen batuk sa katawhan sa Pre-Trial Chamber 1 sang International Criminal Court (ICC). Pinakaulihi diri ang petisyon para sa “gilayon nga status conference” nga ginhapag sadtong Hunyo 17 para kwestyunon ang iskedyul sang pag-atubang ni Duterte sa korte sa Septyembre 23. Gingamit pa sini nga rason ang kuno mga “delay” ukon pagkaatrasar sang mga paghanda sang prosekusyon.

Antes sini, ginbasura na sang korte ang iban pa nga mga “delaying tactic” sang mga abogado ni Duterte. Isa diri ang petisyon para idiskwalipika ang duha ka hukom nga nagauyat sa iya kaso. Sadtong Hulyo 3, ginbalibaran sang plenaryo sang ICC ang ila demanda nga kakason sanday Judge María del Socorro Flores Liera kag Judge Reine Adélaïde Sophie Alapini-Gansou halin sa Pre-Trial Chamber I.

Suno sa ICC, wala sang basehan ang alegasyon sang kampo ni Duterte nga may ginaapinan ang mga hukom tungod sa nauna nila nga pagka-imbolbar sa desisyon kaangot sa hambalanon sang hurisdiksyon sang korte sa kaso. Gin-athag sang ICC nga kabahin sang trabaho sang mga hukom ang liwat pagtalakay sa mga ligal nga hambalanon samtang naga-idog ang kaso, kag wala ini nagakahulugan sang pag-apin ukon bias.

Duha pa ka petisyon nga pagpaatrasar sa proseso ang ginpasaka sang mga abogado ni Duterte. Ang una ang hurisdiksyon sang korte kay Duterte tungod indi na myembro sang ICC ang Pilipinas kag ang ikaduha amo ang pagpangayo sang iya interim release ukon temporaryo nga kahilwayan. Wala pa sang desisyon ang korte sa pareho nga petisyon. Sa kaso sang interim release, hugot ini nga ginpamatukan sang mga biktima, kag ila mga abogado, kag bisan sang prosekusyon sang ICC.

Samtang, padayon ang pag-idog sang kaso sa korte. Sadtong Hulyo 1, nagsumiter ang prosekusyon sang ika-11 nga bugkos sang ebidensya batuk sa anay pangulo, lakip ang masobra 1,000 ka dokumento nga nagasakop sa mga pagpatay halin sa panahon niya bilang meyor sang Davao City tubtob sa iya termino bilang presidente.