Pat-od gid nga ipahambog ni Marcos sa iya ika-apat nga State of the Nation Address ang programa sang “kalinong kag kauswagan” nga ginasulong sang iya rehimen. Gamiton niya ini nga okasyon para palakpakan ang iya mga pasistang gaway kag alipures sa “paglutos sa armadong kagamo.” Kadungan sini, takpan niya ang mga malala nga pagpang-abuso sa gahum kag pagtampalas sa mga demokratikong kinamatarung, sa kasyudaran kag ilabi na sa kaumhan.

Peke kag hapaw ang “kalinong kag kauswagan” nga unod sang “National Action Plan for Unity, Peace and Development” ni Marcos. Isa ini ka matiplangon nga karatula para takpan ang kamatuoran sang lapnagon nga kaimolon, gutom kag pag-antus sang puluan ka milyon ka mangunguma kag mamumugon kag mga wala sang palangabuhian. Katuyuan sini nga ipabaton sa pumuluyo nga ila kapalaran ang ginaantus nila nga pagpamigos kag paghimulos agud lupugon ang ila espirito kag kusog nga magpangapin kag makigbato, kag padukuon sila sa gahum sang teroristang estado.

Sa tabon sang “kalinong,” ginagamit ni Marcos ang mga armadong pwersa sang estado sa pagpatuman sang layi militar sa kaumhan agud sumpuon ang pakigbato sang masang mangunguma. Katuyuan sini nga tiiron ang kada hulag sang taga-baryo, kontrolon ang suplay sang pagkaon kag komersyo, pati oras sang pagtrabaho sa uma sang mga mangunguma. Gina-obligar sila tanan nga magpa-“clear” sang ila ngalan kag “makigbuligay” sa mga opisyal sang militar. Wala ginauntatan ang kilala nga mga lider kag aktibo sa mga organisasyon sang mangunguma. Wala-tuo ang mga kaso sang pagpamatay, pagdakop kag iligal nga pagbilanggo, tortyur kag mga masaker, pagpangkanyon kag paghulog sang bomba malapit sa mga komunidad.

Agud kugmaton ang mga taga-baryo, ginakampuhan sang grupo-grupo nga mga soldado ang mga baryo, kag ginagamit nga baraks ang mga eskwelahan ukon barangay health center. Ginagamo nila ang kalinong sa baryo sa pagpahubog, pagsugal, paggamit sang droga kag patarasak nga pagpalupok sang pusil. Sa ngalan sang “depensang pangteritoryo,” pwersahan nga ginarekrut sang mga soldado ang mga mangunguma sa paramilitar sa grupo nga CAFGU kag Barangay Intelligence Network agud gamiton sila batuk sa ila mga kababaryo.

Sa ngalan sang “pagpasaka sang kapasidad” sang mga komunidad sa kasyudaran, ginagamit ni Marcos ang iya mga armadong pwersa agud sumpuon ang kinamatarung sang mga mamumugon, mala-proletaryado, pamatan-on-estudyante kag iban pa nga sektor sa kasyudaran. Ang mga unyonista kag mga aktibista sa eskwelahan kag mga komunidad ginapaidalum sa sarbeylans kag pagpangkugmat agud pauntaton sa ila pag-organisa kag pagbulig sa ila isigkatawo. Kasubong sa kaumhan, ginagamit nga taktika ang pagpang-ipit kag wala-untat nga pagpamahog sa ila mga pamilya agud brasuhon sila nga magsunod sa kagustuhan sang militar kag pulis.

Engrande nga pagpangtonto sa masang mangunguma ang ginapahambog ni Marcos nga “pagpanagtag sang titulo” nga kadam-an sini daan na nila nga ginauyatan nga kolektibo nga titulo (Certificate of Land Ownership Award) sa idalum sang “agrarian reform communities,” lakip ang mga kadutaan nga daan na nga napanagtag sang rebolusyonaryong kahublagan sa mga mangunguma kag tumandok, nga gintunga-tunga para mahapos nga baklon ukon agawon sang mga dalagko nga manug-agaw sang duta.

Malagpad nga mga kadutaan ang ginasubasta ni Marcos sa mga dumuluong nga mga dalagko nga kapitalista sa dagway sang pagpa-“arkila” nga tubtob 99 ka tuig. Puluan ka libo nga mangunguma kag mga tumandok ang ginpalayas agud hatagan ligwa ang mga plantasyon, minahan, mga proyektong pang-enerhiya, turismo kag iban pa nga operasyon sang mga dalagko nga kumpaniya nga dumuluong kag lokal. Ginatanyagan sila ni Marcos nga mangapital nga wala ukon halos wala sang bayaran nga buwis. Segurado nga mas mabug-at pa nga mga patakaran kontra-pumuluyo kag kontra-nasyunal ang imando ni President Trump sang US sa papet nga si Marcos sa pagkitaay nila sa White House.

Kaugalingon lang ni Marcos ang iya ginatonto, sang iya mga opisyal militar kag kahimbon sa NTF-Elcac sa pagtikal nga malapit na nila nga malutos ang Bagong Hukbong Bayan. Isa na lang kuno ang larangan gerilya sa bug-os nga pungsod, apang mayoriya pa gihapon sang mga batalyon pang-kombat sang AFP ang yara sa kabukiran.

Ginagamit ni Marcos ang pipila ka nagtraidor sa masa agud magkanta sang pagdayaw sa iya “kalinong kag kauswagan.” Sila lunsay mga reaksyonaryo nga ispesyal nga ahente agud magdupla sang disimpormasyon kag kabutigan batuk sa rebolusyonaryong kahublagan.

Ang “kalinong” ni Marcos amo ang paghipos sa lulubngan sang mga biktima sang iya pasista nga paghari. Ginakalipay sang imperyalismong US kag mga lokal nga nagahari nga sahi ang kalinong nga ginapadayaw ni Marcos para bug-os kahilwayan nila nga hugakumon ang kadutaan sang masang mangunguma, wasakon ang mga bukid kag suba, kawkawon ang manggad sang pungsod, kurakuton ang kaban sang manggad sang pungsod kag itukod sa pungsod ang gahum sang pwersang militar sang US.

Ang peke nga “kalinong” nga ini ni Marcos kag sang iya NTF-Elcac kag AFP, pat-od nga dako nga upang sa pakighinun-anon sa kalinong sa NDFP. Upang man ang padayon nga paglagas, pagbilanggo kag pagpatay sa mga konsultant kag tiglawas sang NDFP, taliw-as sa daan nga mga kasugtanan. Indi malab-ot ang makatarungan, mahilwayon kag malawigon nga kalinong tubtob wala ginaatubang kag ginasolbar ang sandigan nga mga problema nga ugat sang armadong konplikto sa pungsod, kag kon ang solo nga katuyuan amo ang dugmukon, ipiton kag pasungkaon ang tanan nga nagapakigbato.

Dapat sikwayon sang pumuluyong Pilipino ang peke kag hapaw nga kalinong ni Marcos. Sa atubang sang nagasingki nga pagpangsumpo, nagalala nga dagway sang pagpamigos kag pagpanghimulos, kag paglala sang krisis sang dunot nga sistemang mala-kolonyal kag mala-pyudal, wala na sang iban pa nga pilian ang pumuluyong Pilipino kundi ang banas sang pakig-away, ilabina ang banas sang armadong paghimakas. Ang armadong paghimakas ang pinakabaskog nga hinganiban sang pumuluyo agud pangapinan ang ila kinamatarung, kabuhi kag palangabuhian.Kon wala sang armadong paghimakas ang pumuluyo, wala-untat nga magpinagusto ang imperyalismong US kag mga nagahari nga sahi sa pagpamigos kag paghimulos sa pungsod.

Sa pihak sang ginaantus nga mga kahalitan tungod sang kaugalingon nga kahuyangan kag sa atubang sang todo-atake sang AFP, determinado ang Bagong Hukbong Bayan nga manikasog sa banas sang armadong pahimakas. Sa pagpamuno sang Partido, tayuyon nga nagalapad kag nagabaskog ang BHB kag baseng masa sini sa bug-os nga pungsod. Nagapabilin nga tuman ka tambok ang duta agud magsulong ang armadong paghimakas kag liwat pabaskugon ang mga larangan gerilya agud magserbe nga balwarte sang pakig-away sang pumuluyo para sa pungsodnon kag sosyal nga kahilwayan.