Tayuyon ang pagpanggamo sang militar kag pulis sa mga komunidad sang mangunguma sa Cavite, Masbate kag Negros Occidental.

Sa Masbate, gin-aresto kag ginpasakaan sang kaso nga rebelyon ang apat ka sibilyan. Gindakop sadtong Hunyo 25 sa Barangay Baras, Esperanza sanday Ronnie Ursal, Manlik Espinosa kag Melicio Malaras, kag sadtong Hunyo 11 si Vicente Colomna. Magluwas kay Colomna, ang tatlo ka iban pa nahilway na. Samtang, ginpaidalum sa de facto nga layi militar ang siyam ka barangay sa banwa sang Palanas kag Dimasalang sugod sadtong Hulyo 11.

Sa Himamaylan City sa Negros Occidental, ginpahog sang mga ahente nga traidor nga “surenderi” nga patyon ang magtiayon nga sanday Jolibert kag Rica Basilio kon indi sila magsungka kag makigbuligay sa 94th IB. Natabo ang pagpamahog sadtong Hulyo 9 sang kadtuan nila ang magtiayon sa ila balay sa Sityo Cabagal, Barangay Buenavista. Nagtuga ang insidente sang kahadlok indi lang sa magtiayon kundi sa bug-os nga komunidad.

Sa Cavite, nagahana nga kampuhan sang 2nd Civil Military Operation (CMO) Company kag Task Force Ugnay ang komunidad sang Tartaria sa Silang, Cavite para ipiton ang tayuyon nga pagpakigbato sang mga mangunguma kag residente kag palayason sila sa lugar.

Samtang, gin-ipit sang Bureau of Corrections (BuCor) ang tigpamaba sang grupo nga Kapatid nga si Fides Lim pagkatapos niya ginreklamo ang mga iligal kag indi makatawo nga patakaran sang ahensya. Gindumilian siya nga makasulod sa tanan nga mga bilangguan nga yara sa idalum sang hurisdiksyon sang BuCor. Aktibo si Lim sa pagpangalap kag pagdul-ong sang makatawo nga ayuda kag nagapakigbato para sa mga kinamatarung sang mga bilanggong pulitikal sa tunga sang nabalita nga pagpatumbaya kag abuso sa sulod sang New Bilibid Prison kag iban pa nga bilangguan.