Sa una niya nga State of the Nation Address, ginpahayag ni Marcos nga ang renewable energy (RE) ginakabig sang iya gobyerno nga yabe nga sektor para kuno sa pagpauswag sang ekonomiya sang pungsod. Halin sadto, nangin agresibo kag barahubal ang pagpang-agaw sang kadutaan kag pagguba sang kapalibutan para hatagan ligwa ang mga mangapital sa RE sa pungsod. Nagalab-ot sa 68% sang dumuluong nga pangapital sadtong 2024 para sa mga proyektong RE.

Sa idalum sang National Renewable Energy Program (NREP), target nga 50% sang enerhiya sang Pilipinas pag-abot sang 2024 halin sa RE. Ginhimo ini sa kuno katuyuan nga makaangkon sang “sustenable nga kuluhaan” sang enerhiya. Ang RE ang bisan ano man nga enerhiya nga biomass (pagkadunot sang organiko nga materyal), solar (adlaw), wind (hangin), geothermal (mainit nga sungaw halin sa duta) kag hydropower (tubig).

Labi nga ginpahapos kag ginpadasig ni Marcos ang paghatag sang permit kag lisensya sa mga dumuluong kapitalistang nagapangapital sa RE. Sadtong Abril, naghatag ang Department of Energy sang permit para sa 1,319 nga proyektong RE, 39% ukon 517 diri proyektong solar. Ang Ilocos ang ikaapat sa may pinakadamo nga proyektong solar, nga may 53 ka proyekto. Target man sang estado nga makaangkon sang 46,000 ektarya nga solar farms pag-abot sang 2040.

Madasig naman nga ginhingalitan sang mga lokal nga mga dalagko nga kumprador burgesya ang mga proyektong RE sa pungsod agud mabenepisyuhan ini. Kalakip diri ang Solar Philippines New Energy Corp.(SPNEC) ni Manny Pangilinan, AC Energy Corp.(ACEN) sang mga Ayala, APC Group Inc./Philippine Geothermal Production Co.sang pamilya Sy, Astra Solar Energy Corp.sang kumpaniya nga Aboitiz, San Miguel Global Power Holdings ni Ramon Ang kag Energy Development Corporation (EDC) sang Lopez Group.

Isa sa pinakamapangwasak nga RE nga proyekto amo ang 3,500 ektaryang solar farm (mas dako pa sa bug-os nga duta sang Makati City kag Mandaluyong) nga ginapanag-iyahan sang Meralco Terra Solar sa bahin sang Bulacan kag Nueva Ecija. Natalana ini nga mangin pinakadako nga solar kag battery facility sa bug-os nga kalibutan. Ginapanag-iyahan ini sang SPNEC kag Actis, kumpaniya nga nakabase sa United Kingdom.

Sakupon naman sang Laguna Lake Floating Solar Project ang 2,000 ektarya sang linaw sa bahin sang Calamba, Santa Rosa, Cabuyao, Bay kag Victoria. Ginapanag-iyahan ang proyekto sang ACEN kag mga kumpaniya halin sa Singapore kag UK.

Lakip sa pinakadalagko nga mga offshore kag onshore windfarm nga itukod amo ang sa San Miguel Bay, Camarines Sur, nga magasakop sa 23,307 nga katubigan pangmunisipyo sang San Miguel. May kapasidad ini nga 1,000 megawatts (MW) kag ginapanag-iyahan ini sang Copenhagen Infrastructure New Market Fund Corp., kumpaniya halin Denmark kag ACEN nga may 25% nga sosyo. Itukod man ang 1,200 MW Guimaras Strait OSWF nga itukod sa tunga sang Panay kag Negros nga ginapanag-iyahan sang mga kumpaniya halin sa Switzerland kag Liechtenstein. Itukod man sang ACEN ang 2,510 MW Quezon North Wind Farm sa Real, Quezon kag ang 625 ektarya nga North Luzon Renewable Wind Farm sa Pagudpod, Ilocos Norte.

Yara sa 99 ka proyekto nga hydropower, nga may kabug-osan nga 4,000 MW, ang gin-aprobahan sang gobyerno sa Cordillera. Apat sa mga proyekto diri ginapanag-iyahan sang kumpaniya halin Australia. Natalana man nga magtukod sang talto ka geo-thermal power plant (GPP) sa rehiyon nga magatuga sang kabug-osan nga 300 MW nga kuryente. Ang mga ini ang Buguias-Tinoc GPP nga ginapanag-iyahan sang EDC, kag Kalinga GPP kag ang Mainit-Sadanga GPP nga lunsay ginapanag-iyahan sang APC.

Ginarason sang reaksyonaryong estado ang “pag-atubang sa krisis sa klima” para ipalusot ang binilyon nga balor sang proyektong RE. Apang sa pagkamatuod, ginapahuyang sini ang ikasarang sang pungsod nga atubangon ang mga unos sang pagbag-o sang klima sa wala-untat nga pagguba sa kapalibutan para hatagan ligwa ang mga pasilidad nga ini.

Ang mas malala, puluan ka libo ka mangungumga, mangingisda kag tumandok ang mawad-an sang palangabuhian kag puluy-an kag linibo ka ektarya nga dutang agrikultural, kadagatan kag kagulangan ang wasakon sa ngalan sang matinlo nga enerhiya nga monopolisado sang dumuluong kag lokal nga kumprador burgesya.