Napatay iti maysa nga ambus ti New People’s Army (NPA)-Mindoro (Lucio de Guzman Command) ti dua a pulis bayat nga agbibyahe da iti Barangay Bagong Silang, Victoria, Oriental Mindoro idi Hulyo 13 ti malem. Segun iti hukbo ti umili, sungbat daytoy iti kiddaw dagiti Mindoreño a pagsungbaten ti AFP-PNP iti terorista a kampanya daytoy kadagiti ili iti Central Oriental Mindoro.

Ti presensya a militar ken pulis iti ili ti Victoria ket mangmangted seguridad iti dadakkel a managdadael ken kontra-umili a proyekto. Karaman ditoy ti pito a lugar iti panagkwari iti Victoria a pinalubosan ti lokal a gubyerno. Nakaplano met ti panagserrek ti dakkel nga operasyon ti minas iti Victoria manipud ti panangbiag iti Mineral Production Sharing Agreement ti Mindoro Nickel Project.

Dadaelen dagitoy ti rinibo nga ektarya a daga a pagbibiagan dagiti mannalon ken katutubo a Mangyan. Kadawyanen nga agpwesto dagiti pulis ken militar sakbay a mangrugi dagiti managdadael a proyekto tapno lapdan ti panangsalaknib ti umili iti daga ken natural a kinabaknang da.