Kababaihan, nagprotesta laban iti kumarkaro a panagbisin. Awit dagiti kaldero ken kaserola, pinampag dagiti kameng ti Gabriela, Gabriela Women’s Party ken Amihan ti Department of Agriculture idi Hulyo 7 seknan ti kumarkaro a panagbisin ti umili. Dinakamat da ti sarbey ti Social Weather Station itay nabiit, nga agkunkuna a maysa iti tunggal lima a pamilya a Pilipino, wenno 27.2% ti agsagsagaba ti “involuntary hunger” wenno panagbisin gapu ti kinarigat, kinaranggas wenno panagbalbaliw ti aglawlaw.

Dagiti mangmangged pangpubliko para iti nayon a sweldo ken kinatalged ti trabaho. Nagkakadwa dagiti empleyado, manursuro ken mangmangged iti salun-at iti pangpubliko a sektor iti maysa a protesta idi Hulyo 11 idiay Quezon City tapno iyawag iti rehimen Marcos ti nayon a sweldo ken kinatalged ti trabaho. Inyaramid da ti tignay mano a lawas sakbay ti maika-4 nga state of the nation address ni Ferdinand Marcos kas panangtalmeg iti nabayagen a kadawatan da. Kangrunaan nga awag da ti panangsungbat ti estado iti matentennag a kalidad ti biag dagiti empleyado iti sango ti ngumatngato nga implasyon.

Panangitakder ti Alunan Dam, balbaliw a supsupyaten dagiti Lagunense. Nasurok sangaribo a residente ti Pakil, Laguna, kabilang dagiti organisasyon ti tao’t simbaan, agtutubo, mannalon, mangngalap ken dagiti salaknib ti law-ang ti nagmartsa idi Hulyo 5 tapno iyebkas ti nainget a panagsupyat da iti maitaktakder nga Ahunan Dam. Manipud iti Saint Peter of Alcantara Parish Church, nagmartsa dagiti raliyista agturong iti upisina ti Ahunan Power Inc., nu sadinno a nabasa ti pablaak ti panagkaykaysa ken nairakurak ti pungtot ti umili.

Baro a CBA, naipangabak iti Fuji Electric Philippines. Iti agtultuloy a panangirupir, naipangabak ti Lakas ng Nagkakaisang Manggagawa sa Fuji Electric Philippines Inc. (LNMFEPO-OLALIA-KMU) ti nayon a sweldo ken dadduma pay a benepisyo para iti baro a collective bargaining agreement. Tinawen a makaala da ti nayon a ₱50 iti unos ti tallo a tawen, makaawat ti alawans ti taraon, bagas ken dadduma pay. Ti kumpanya ket pabrika ti semikonduktor a nakabase idiay Laguna.