Agsasaruno a petisyon ti insumite ti kampo ni dati a presidente Rodrigo Duterte tapno itantan ti panagdengngeg iti kaso na a krimen laban iti sangkataw-an iti Pre-Trial Chamber 1 ti International Criminal Court (ICC). Kaudian ditoy ti petisyon para iti “madagdagus nga status conference” nga indatag da idi Hunyo 17 tapno kwestyunaren ti iskedyul ti panagsango ni Duterte iti korte inton Setyembre 23. Inusar da pay a pambar ti kampay idi a “delay” wenno pannakaitantan dagiti panagsagana ti prosekusyon.

Sakbay daytoy, inbasuran ti korte ti dadduma pay a “delaying tactic” dagiti abugado ni Duterte. Maysa ditoy ti petisyon tapno idiskwalipika ti dua nga ukom a mangig-iggem iti kaso na. Idi Hulyo 3, pinagkedkedan ti plenaryo ti ICC ti kiddaw da nga ikkaten da Judge María del Socorro Flores Liera ken Judge Reine Adélaïde Sophie Alapini-Gansou manipud iti Pre-Trial Chamber I.

Segun iti ICC, awan ti basaran ti alegasyon ti kampo ni Duterte nga adda ti pabpaboran dagiti ukom gapu iti umuna a pannakairaman da iti desisyon kanaig iti usapin ti hurisdiksyon ti korte iti kaso. Inlawag ti ICC a paset ti trabaho dagiti ukom ti balbaliw a panangtalantan kadagiti legal nga usapin bayat nga aggungunay ti kaso, ken saan a kayat a sawen daytoy nga adda ti pabpaboran wenno bias da.

Dua pay a petisyon a pangtantan iti proseso ti inpila dagiti abugado ni Duterte. Ti umuna ket ti hurisdiksyon ti korte ken Duterte gapu ta saanen a kameng ti ICC ti Pilipinas ken ti maikadwa ket ti panagdawat ti interim release wenno temporaryo a pannakawayawaya na. Awan pay ti desisyon ti korte iti agpada a petisyon. Iti kaso ti interim release, nainget a supsupyaten daytoy dagiti biktima ken dagiti abugado da, ken uray ti prosekusyon ti ICC.

Kabayatanna, agtultuloy ti panaggunay ti kaso iti korte. Idi Hulyo 1, nagsumite ti prosekusyon ti maika-11 a ragup ti ebidensya laban iti dati a pangulo, karaman ti nasurok 1,000 dokumento a sumaksaklaw kadagiti pammapatay manipud iti panawen na kas mayor ti Davao agingga iti termino na kas pangulo.