Iti napalabas a dua a tawen, todo-todo ti panagpalawa ti US iti presensya a militar ken panangitakder kadagiti imprastruktura a militar daytoy iti Pilipinas. Idi 2024, inpwesto daytoy ti Typhon Missile Sytem iti amianan a Luzon. Sinaruno daytoy tatta a tawen ti panagserrek ti NMESIS, MADIS ken dadduma pay nga armas a panggubat.

Daytoy met laeng a tawen, tinagikua ti US ti pasilidad nabal iti Oyster Bay idiay Palawan. Inmandar daytoy ti panagitakder ti pabrika ti bala iti Subic ken inruar daytoy ti umuna a pondo para iti konstruksyon ti Subic-Clark-Manila-Batangas Railway. (Kitaen ti kanaig nga artikulo iti AB, Hulyo 7, 2025.) Dagitoy ket paset amin iti panagisagana ti US iti pagilyan kas maysa a dakkel a forward operating base iti parparnuayen daytoy nga imperyalista a gera laban iti China.

Nalawag nga aglablabesen iti siyam a “napagkaykaysaan nga EDCA site” (Enhanced Defense Cooperation Agreement) ti tinagikua ken ar-aramaten ti US a base iti Pilipinas. Iti linged ti awan-ressat a war games, pinapardas ti US ti konstruksyon dagiti baraks, bodega ken dadduma pay nga imprastruktura iti uneg dagiti kampo ti Armed Forces of the Philippines (AFP) tapno pagbalayan ti dumakdakkel a bilang dagiti tropa, ramit ken lugan dagiti Amerikano a makatawen nga agtaltalinaed iti uneg ken aglawlaw ti pagilyan.

Idi Hunyo, inaprubaran ti Kongreso ti US ti $1-$5 bilyon a pondo para iti “upgrade” ti sangladan a nabal ti AFP iti Oyster Bay. Us-usarenen ti US ti sangladan para kadagiti “freedom of navigation operation” ken “joint patrol” iti South China Sea, karaman ti Australia ken Japan. Manipud pay 2020, pinagbalin ti US ti naulimek a komunidad dagiti mangngalap ditoy a maysa a kangrunaan a pasilidad para kadagiti barko ken drone a pangbaybay nga ar-aramaten daytoy tapno probokaren dagiti barko a Chinese ken pangatwen ti tensyon iti South China Sea. Ipampambar ti AFP ken US dagiti patrulya kas “panangsalaknib kadagiti mangngalap a Pilipino,” ngem iti aktwal, ti US ken dagiti higante a barko daytoy ti mangipapaidam iti pagbiagan da iti Oyster Bay ken asideg a kabaybayan.

Kagiddan na, naipadamag daytoy Hulyo ti panagitakder ti US ti maysa a base a nabal iti kabaybayan ti Palawan, iti batog ti munisipalidad ti Quezon. Segun kadagiti ulat, napili ti lokasyon gapu iti kaasideg daytoy iti Second Thomas Shoal, maysa kadagiti nagtaudan ti susik iti kabaybayan iti baet ti Pilipinas ken China. Ditoy a maiyistasyon dagiti “inflatable boat” a maus-usar iti panag-atake ken pangnayon iti maus-usaren ti militar ti Pilipinas iti pannakirikrikyar daytoy kadagiti barko ti China. Target ti US a paandaren ti base iti umuna a kwarter ti 2026.

Daytoy met laeng a tawen, rinugyanen a sukogen ti US ti plano daytoy nga aramaten ti Pilipinas kas dakkel a bodega ti ramit a panggubat. Umannurot daytoy iti 2025 Joint Vision Statement on Defense Industrial Cooperation a pinirmaan ti rehimen Marcos ken gubyerno ni Donald Trump idi Marso. Wagas daytoy ti US tapno masigurado ti napaspas ken saan a maputed a suplay ti ramit panggubat iti kanito a bumtak ti inter-imperyalista a gubat.

Iti linged ti “kolaborasyon” ken “panangpadur-as ti kapasidad iti depensa ti AFP,” itakder ti US iti nadumaduma a paset ti pagilyan dagiti pabrika daytoy ti bala, unmanned systems (drone), pasilidad nga agproseso kadagiti “kritikal a mineral” nga maus-usar kadagiti bomba ken “additive manufacturing” kas ti 3D printing.

Idi Mayo, inpweston ti US iti Fort Magsaysay idiayTarlac ti maysa a 3D printer nga addaan kabaelan nga agaramid ti babassit a drone (naawagan a first-person view wenno FPV drone) a nakaannatop iti tereyn ken klima ti Pilipinas. Nausar dagitoy a drone iti naisayangkat a Salaknib Exercises Phase 2 tapno “layusen ti mata” ti kabakiran ken dagiti barbaryo iti Northern Luzon. Kabinnadang iti daytoy nga aktibidad ti 7th ID ken 5th ID ti AFP ken rehimen Marcos ti Aurora para iti panagmanupaktura ti US kadagiti drone idi 2024.

Dagiti pabrika, makina ken ramit panggubat a maideploy iti Pilipinas ket direkta a patarayen ti militar ken dagiti gamat dagiti kapitalista iti industriya a militar ti US.