Tuluy-tuloy ti panangriribuk ti militar ken pulis kadagiti komunidad ti mannalon iti Cavite, Masbate ken Negros Occidental.

Idiay Masbate, naaresto ken napilaan ti kaso a rebelyon ti uppat a sibilyan. Nakemmeg idi Hunyo 25 iti Barangay Baras, Esperanza da Ronnie Ursal, Manlik Espinosa ken Melicio Malaras ken idi Hunyo 11 ni Vicente Colomna. Malaksid ken Colomna, ti tallo a dadduma pay ket nawayawayaan. Kabayatanna, naipasidong iti de facto a linteg militar ti siyam a barangay iti ili ti Palanas ken Dimasalang manipud idi Hulyo 11.

Iti Himamaylan City idiay Negros Occidental, pinangtaan dagiti ahente a traydor a “surenderi” a papatayen ti agassawa a Jolibert ken Rica Basilio nu saan da a sumuko ken makitinnulong iti 94th IB. Napasamak ti panagpangta idi Hulyo 9 idi napan da iti balay ti agassawa idiay Sityo Cabagal, Barangay Buenavista. Nangitunda ti insidente ti buteng saan laeng nga iti agassawa nu di ket iti intero a komunidad.

Idiay Cavite, nakaplano nga agkampo ti 2nd Civil Military Operation (CMO) Company ken Task Force Ugnay ti komunidad ti Tartaria idiay Silang, Cavite tapno lipiten ti tuloy-tuloy a panaglaban dagiti mannalon ken residente ken pagtalawen isuda iti lugar.

Kabayatanna, linipit ti Bureau of Corrections (BuCor) ti tagapagsarita ti grupo a Kapatid a ni Fides Lim kalpasan nga ireklamo na dagiti iligal ken saan a makatao a patakaran ti ahensya. Naparitan isuna a sumrek iti amin a pagbaludan nga adda iti hurisdiksyon ti BuCor. Aktibo ni Lim iti panagkalap ken panangitulod ti makatao nga ayuda ken makilablaban para iti karbengan dagiti balud pulitikal iti tengnga ti maipadpadamag a panagbaybay-a ken panagabuso iti uneg ti New Bilibid Prison ken dadduma pay a pagbaludan.