Iti umuna nga State of the Nation Address, inrakurak ni Marcos a ti renewable energy (RE) ket ibilang ti gubyerno na a kangrunaan a sektor para kano iti panangpadur-as ti ekonomya ti pagilyan. Manipud idi, nagbalin nga agresibo ken agdadata ti panagkamkam ti daga ken panagdadael ti law-ang tapno wayaan ti dalan dagiti agpupuonan iti RE iti pagilyan. Dumanon iti 68% ti gangannaet a puonan idi 2024 ket dagiti proyekto nga RE.

Iti sidong ti National Renewable Energy Program (NREP), target a 50% ti enerhiya ti Pilipinas inton 2040 ket agtaud iti RE. Nabukel daytoy iti kano panggep a maaddaan ti “sustenable a pagtaudan” ti enerhiya. Ti RE ket anyaman kadagiti enerhiya a biomass (nabulok nga organiko a materyal), solar (init), wind (angin), geothermal (napudot nga alibuob manipud iti daga) ken hydropower (danum).

Ad-adda a pinabiit ken pinapardas ni Marcos ti panangited ti permit ken lisensya kadagiti gangannaet a kapitalista nga agpuonan iti RE. Idi Abril, nangted ti Department of Energy ti permit para iti 1,319 a proyekto nga RE, 39% wenno 517 ditoy ket proyekto a solar. Ti Ilocos ti maikapat nga addaan kaadwan a proyekto a solar, nga addaan 53 a proyekto. Target met ti estado a maaddaan ti 46,000 ektarya a solar farms inton 2040.

Napaspas met a ginammatan dagiti lokal a dadakkel a burges kumprador dagiti proyekto nga RE iti pagilyan tapno pakinabangan daytoy. Kabilang ditoy ti Solar Philippines New Energy Corp. (SPNEC) ni Manny Pangilinan, AC Energy Corp. (ACEN) dagiti Ayala, APC Group Inc./Philippine Geothermal Production Co. ti pamilya Sy, Astra Solar Energy Corp. ti kumpanya nga Aboitiz, San Miguel Global Power Holdings ni Ramon Ang ken Energy Development Corporation (EDC) ti Lopez Group.

Maysa kadagiti kakarwan a managdadael nga RE a proyekto ket ti 3,500 ektarya a solar farm (dakdakkel pay ngem ti sibubukel a daga ti Makati City ken Mandaluyong) a tagikua ti Meralco Terra Solar iti paset ti Bulacan ken Nueva Ecija. Naituding daytoy nga agbalin a kadakkelan a solar ken battery facility iti intero a lubong. Tagikua daytoy ti SPNEC ken Actis, kumpaya a nakabase idiay United Kingdom.

Sakupen met ti Laguna Lake Floating Solar Project ti 2,000 ektarya ti dan-aw iti paset ti Calamba, Santa Rosa, Cabuyao, Bay ken Victoria. Ti proyekto ket tagikua ti ACEN ken dagiti kumpanya manipud Singapore ken UK.

Kabilang iti kadadakkelan nga offshore ken onshore windfarm a maitakder ket idiay San Miguel Bay, Camarines Sur, a sumakop iti 23,307 ektarya a kadanuman a pangmunisipyo ti San Miguel. Addaan kapasidad daytoy a 1,000 megawatts (MW) ken tagikua ti Copenhagen Infrastructure New Market Fund Corp., kumpanya manipud Denmark ken ACEN nga addaan 25% a sosyo. Maitakder met ti 1,200 MW Guimaras Strait OSWF a maitakder iti tengnga ti Panay ken Negros a tagikua dagiti kumpanya manipud Switzerland ken Liechtenstein. Kasta met nga itakder ti ACEN ti 2,510 MW Quezon North Wind Farm idiay Real, Quezon ken ti 625 ektarya a North Luzon Renewable Wind Farm idiay Pagupud, Ilocos Norte.

Adda iti 99 a proyekto a hydropower, nga addaan kabuklan a 4,000 MW ti inaprubaran ti gubyerno iti Cordillera. Uppat kadagiti proyekto ditoy ket tagikua ti kumpanya manipud Australia. Naituding met nga agitakder ti tallo a geothermal power plant (GPP) iti rehiyon nga agpataud ti kabuklan a 300 MW a kuryente. Dagitoy ket ti Buguias-Tinoc GPP a tagikua ti EDC, ti Kalinga GPP ken ti Mainit-Sadanga GPP nga agpada a tagikua ti APC.

Ipampambar ti reaksyunaryo nga estado ti “panagsango iti krisis iti klima” tapno ilusot ti binilyon a gatad a proyekto nga RE. Ngem ti agpayso, pakpakapsuten dagitoy ti kabaelan ti pagilyan a sangwen dagiti didigra ti panagbaliw ti klima iti awan-ressat a panangdadael iti law-ang tapno wayaan dagitoy a pasilidad.

Nakaro pay, manopulo a ribo a mannalon, mangngalap ken katutubo ti maawanan ti pagbiagan ken pagtaengan ken rinibo nga ektarya a daga nga agrikultural, kabaybayan ken kabakiran ti madadael iti nagan ti nadalus nga enerhiya a monopolisado ti gangannaet ken lokal a burges kumprador.