Mga kababayin-an, nagprotesta kontra ha natikagrabe nga kagutom. Bitbit an mga kaldero ngan kaserola, nagprotesta an mga membro han Gabriela, Gabriela Women’ Party ngan Amihan ha Department of Agriculture hadton Hulyo 7 hiunong ha natikagrabe nga kagutom han katawhan. Ginsering nira an diri pala maiha nga sarbey han Social Weather Stations, nga nagsesering nga usa ha kada lima nga pamilya nga Pilipino, o 27.2% an nahiaagum han “involuntary hunger” o kagutom durot han kakablasan, kamadarahug o pagbabag-o ha kalibungan.

Mga pampubliko nga trabahador para ha dugang nga sweldo ngan kaseguruhan ha trabaho. Nagburunyog an mga empleyado, magturutdo ngan trabahador pankalibsugan ha pampubliko nga sektor ha usa nga protesta hadton Hulyo 11 ha Quezon City agud igpanawagan ha rehimen Marcos an dugang nga sweldo ngan kaseguruhan ha trabaho. Iginhimo nira an paggios pira kasemana antes an ika-4 nga state of the nation address ni Ferdinand Marcos komo pagduon ha maiha na nira nga demanda. Prinsipal nira nga panawagan an pagbaton han estado ha natikaluros nga kalidad han kinabuhi han mga empleyado atubangan han natikahitaas nga implasyon.

Pagtindog han Ahunan Dam, utro nga gintipahan han mga Lagunense. Masobra usa kayukot nga residente han Pakil, Laguna, kaupod an mga organisasyon han tawo ha singbahan, kabatan-unan, parag-uma, parupangisda, ngan mga tagdepensa han kalibungan, an nagmartsa hadton Hulyo 5 agud igpahayag an ira makusog nga pagtipa ha gintitindog nga Ahunan Dam. Tikang ha Saint Peter of Alcantara Parish Church, nagmartsa an mga raliyista tikadto ha upisina han Ahunan Power Inc., diin ginbasa an pahayag han pagkaurusa ngan iginpahayag an kangalas han katawhan.

Bag-o nga CBA, nahidaug ha Fuji Electric Philippines. Ha padayon nga pag-iinsister, nahidaug han Lakas ng Nagkakaisang Manggagawa sa Fuji Electric Philippines Inc. (LNMFEP-OLALIA-KMU) an dugang nga suhol ngan iba pa nga mga benepisyo para ha bag-o nga collective bargaining agreement. Tinuig hira nga makakakuha han dugang nga ₱50 ha sakob han tulo katuig, makakakarawat han alawans ha pagkaon, bugas ngan iba pa. An kompaniya pabrika han semikonduktor nga nakabase ha Laguna.