Dirudiretso an panriringgal han militar ngan pulis ha mga komunidad han parag-uma ha Cavite, Masbate ngan Negros Occidental.

Ha Masbate, gin-aresto ngan ginsalawdan han kaso nga rebelyon an upat nga sibilyan. Gindakop hadton Hunyo 25 ha Barangay Baras, Esperanza hira Ronnie Ursal, Manlik Espinosa ngan Melicio Malaras, ngan hadton Hunyo 11 hi Vicente Colomna. Labot kan Colomna, nakagawas an tulo nga iba pa. Samtang, iginpailarum ha de facto nga balaud militar an siyam nga barangay ha bungto han Palanas ngan Dimasalang tikang hadton Hulyo 11.

Ha Himamaylan City ha Negros Occidental, gintarhug han mga traydor nga ahente nga “surenderi” nga papatayon an mag-asawa nga hira Jolibert ngan Rica Basilio kun diri hira sumurender ngan makikigbuligay ha 94th IB. Nahitabo an pananarhug hadton Hulyo 9 han kadtuon nira an mag-asawa ha ira balay ha Sityo Cabagal, Barangay Buenavista. Nagdurot an insidente han kahadlok diri la ha mag-asawa kundi ha bug-os nga komunidad.

Ha Cavite, namamangpangan nga kampuhan han 2nd Civil Military Operation (CMO) Company ngan Task Force Ugnay an komunidad han Tartaria ha Silang, Cavite agud gipiton an dirudiretso nga pag-ato han mga parag-uma ngan residente ngan palayason hira ha lugar.

Samtang, gin-gipit han Bureau of Corrections (BuCor) an tagapagyakan han grupo nga Kapatid nga hi Fides Lim kahuman niya igreklamo an mga iligal ngan diri makatawo nga palisiya han ahensya. Gindid-an hiya nga makasakob ha ngatanan nga mga prisuhan nga aada ha ilarum han hurisdiksyon han BuCor. Aktibo hi Lim ha pagpapalutaw ngan pagdudul-ong han makatawo nga ayuda ngan nakikigbisog para ha mga katungod han mga priso pulitikal ha butnga han nahibabalita nga pagpapasibaya ngan abuso ha sakob han New Bilibid Prison ngan iba pa nga prisuhan.